Жастарға қызмет көрсету орталығында өңір басшысының орынбасары Жақсылық ОМАР облыстағы цифрландырудың жай-жапсарымен танысты. Жиында әртүрлі компаниялар, облыстық басқармалар, департаменттер және қоғамдық бірлестіктер өз жобаларын ұсынып, атқарылар ауқымды істерімен бөлісті.
Айталық, облыстық ішкі саясат басқармасы тарапынан жоспарланған жобалар үлкен маңызға ие. Мысалы, жыл соңына дейін бірнеше іс-шара өтіп, Талдықорған қаласы толығымен әйгілі халықаралық «2ГИС» картографиялық компаниясының картасында белгіленеді. «Рухани жаңғыру», «Virtual reality» мобильді қосымшасы, «Ақылды қала» жобасы және қашықтықтан оқыту жұмыстары жетілдіріледі. Сол бағытта халыққа пайдасы мол, заман талабына сай сандық технологияларды пайдалану қарастырылады. Сондай-ақ, алда жоспарланған «Zhetysy digital» форумы, озық технологиялар көрмесі, IT саласындағы конкурстар Елбасы берген тапсырманың жүйелі орындалуына септігін тигізері анық. Облыстық жастар саясаты мәселелері басқармасы тарапынан ашылатын «zhastart. kz» ақпараттық порталы көптеген ақпараттық көмек көрсетуге әзір. Әсіресе, жастардың жұмысқа орналасуы мен қайырымды істермен айналысуына мүкіндік туғызады. Облыстық туризм басқармасы аймақтағы жол белгілері, көрікті жерлер және демалыс нысандарына QR-код енгізіп жатыр. Облыстық ішкі істер департаменті қылмыс жасау мен жол жүру ережесін бұзуға тосқауыл болатын арнайы жүйені енгізуді ұсынды. Облыстық мәдениет, архивтер және құжаттама басқармасы электронды архив, мұражайдағы жәдігерлердің 3D көріністерін сайтқа енгізу, кітаптарды сканерлеп электронды нұсқаға өзгерту секілді жоспарларымен бөлісті.
Жиында халыққа қызмет көрсету, туризм, білім, мәдениет, қылмыстың алдын алу, жат діни ағымдардан сақтану, жұмыспен қамту, тұрғындардың коммуналдық төлемдерді оңай төлеу жолдары сынды өзекті тақырыптар талқыланды.
– Біз әлі күнге дейін “цифрландыруды” түсінбей жатырмыз. Тәжірибе алмасыңыздар, басқа да компаниялармен бірлесіп, жоба дайындаңыздар. Өзге өңірлер не істеп жатқанын қадағалаңыздар. Көңіл толарлық жайтты байқамадым. Әсіресе, экономикалық бағыттағы жұмыстарды тереңдетуіміз қажет, – деп ескертті Жақсылық Мұқашұлы. Сөз соңынан көңілге қонымды кейбір жобаларды жетілдіріп, ал көпшілігін жаңадан қарастыру керектігін қатаң тапсырды.
Мәулен ӘНЕРБАЙ.
