Елбасының кезекті сапарының бірінде топырағы құнарлы Еңбекшіқазақ ауданында алма өсіруді қолға алу керектігі айтылған еді. Сол уақыттан бері еңбекшіқазақтықтар еселеп тер төгіп, бақ алқабын ұлғайтты. Қазір аудандағы интенсивті бақ аумағы 900 гектардан асып отыр. Бұл туралы Еңбекшіқазақ ауданының әкімі Бинәлі Ысқақ өңірлік коммуникациялар қызметінде өткен баспасөз мәслихатында кеңірек тарқатты.
Кездесуде ауданның былтырғы әлеуметтік-экономикалық даму көрсеткіштері және биылдың еншісінде атқарылуы тиіс міндеттер мен болжамдар атап өтілді. Осы ретте аудан әкімі ең алдымен Мемлекет басшысының ауылшаруашылығы жүйесін қарқынды дамытуға баса назар аударғанын айта келіп, сол бағыттағы ұстанған саясаттың артықшылығына тоқталды. Бүгінде аймақта ауылшаруашылығы өнімдерін өңдеу заманауи озық технологияларды қолдану арқылы жүзеге асырылуда. Сонымен қатар, шетелден әкелінген дәнді дақылдардың жаңа сорттарын жерсіндіру жұмыстары да ойдағыдай атқарылған. Өңір осы арқылы ауылшаруашылығы өнімдерін өндіруде облыстағы алдыңғы қатарлы аймақтардың біріне айналып отыр.
Бинәлі Ысқақтың айтуынша, аталмыш салада кооператив құрудың маңызы зор. Осы мақсатпен бүгінгі таңда 298 ұсақ шаруашылық біріктірілген. Соның негізінде 19 ауылшаруашылығы кооперативі құрылды. Оларға қолдау көрсетіп, дамыту үшін 419 миллион теңге қарастырылған. Сол сияқты мал шаруашылығын өркендетуге де республикалық бюджеттен 163 миллион теңге бөлініпті. Ең бастысы, бұл қаржы толығымен игерілді.
Заман талабына сай үдемелі дамытуды қажет ететін өнеркәсіп саласында да ауыз толтырып айтарлықтай жетістіктер аз емес. «ФудМастер», «Адал», «Голдпродукт» сияқты елімізге белгілі ірі кәсіпорындар өнім өндірудің көлемін жыл сайын арттырып келеді. Сондай-ақ, Ақши ауылдық округіндегі жоңышқа өңдеу және Бәйтеректегі майлықтар мен дәретхана қағаздарын шығару зауыттары, Шелек ауылындағы ет өңдеу комбинаттары нәтижелі жұмыс істеуде. Бүгінде аудандағы өнеркәсіп өнімінің көрсеткіші 31 миллиард 767 миллион теңгеге жетті.
Баспасөз мәслихатында ауданның жасыл энергияны дамытудағы тың талпынысы да назардан тыс қалмады.
– Өткен жылы Масақ ауылдық округінде қуаты 4,5 Мвт болатын жел электр стансысы салынды. Түргендегі су электр стансысының құрылысы да аяқталды. Алдағы уақытта Сөгеті ауылдық округінен қуаты 200 Мвт күн электр стансысы, сондай-ақ, Шелек ауылында су электр стансысы сияқты бірқатар жаңа құрылыстардың жұмысы басталады. Ауданымыз осылайша баламалы энергия көздерін пайдалануға қол жеткізбек, – дейді Бинәлі Әбдіқапасұлы.
Аудан халқын жұмыспен қамту, орталықтандырылған су жүйесі және көгілдір отынмен қамтамасыз ету мәселесінде қол жеткізген жетістіктер аз емес. Брифингте дәрігерлік амбулатория, мектеп, балабақша санын арттырып, өңір тұрғындарының әлеуметтік қажеттілігін қанағаттандыру мәселесі де таразыланды. Қорыта айтқанда, аймақтың алға басқан ісі көп.
Қ. ӘБДІҒАПАР
