Талдықорған қаласының Тіл сарайында облыстық Қазақстан халқы Ассамблеясы жанындағы жетекші журналистер мен сарапшылар клубының ұйытқы болуымен «дөңгелек үстел» өтті. «Тағдыр тоғыстырған Қазақстан халқы. Алғыс айту күні» атты тақырыпта өрбіген жиынды облыстық Қазақстан халқы Ассамблеясы төрағасының орынбасары, хатшылық меңгерушісі Ғабит Тұрсынбай ашып, жүргізді.
Басқосуға «Достық үйі – Қоғамдық келісім орталығының» директоры Тәңірберген Қасымберкебаев, облыстық тілдерді дамыту басқармасының басшысы Айдар Башбаев және облыстық Қазақстан халқы Ассамблеясы жанындағы Аналар, Қоғамдық келісім кеңестері, этномәдени бірлестіктер төрағалары мен белсенділері, облыстық, аудандық, қалалық газеттердің журналистері, блогерлер, І. Жансүгіров атындағы Жетісу мемлекеттік университетінің білімгерлері қатысты. Алғашқы сөзді облыстық Қоғамдық келісім кеңесінің төрағасы Оралбек Жақиянов алды.
– Алғыс айту күні – әртүрлі этнос өкілдерінің қасиетті қазақ жері мен қонақжай халқымызға терең тағзымының белгісі. Депортация басталған қиын-қыстау кезеңде біздің ата-апаларымыз өзге этнос өкілдерін жатсынбай бауырына басты, қамқор құшағына алды. Қысылса да үйінен орын берді, бір үзім наны мен жарты құртын бөлісіп жеді, – деген Оралбек Нұрсейітұлы мерекеге орай өңірде ұйымдастырылатын іс-шаралармен таныстырды. Жыл сайынғы дәстүр бойынша барлық аудан, қалаларда қайырымдылық шаралары арқылы мүмкіндігі шектеулі жандарға, ҰОС ардагерлеріне, аз қамтылған отбасыларға әлеуметтік көмектер көрсетілетінін тілге тиек етті.
Бұдан кейін І. Жансүгіров атындағы Жетісу мемлекеттік университетіндегі «Рухани жаңғыру» орталығының меңгерушісі, облыстық ҚХА жанындағы ғылыми-сарапшылық топ мүшесі, тарих ғылымдарының кандидаты Назгүл Байғабатова, облыстық «Вайнах» шешен-ингуш этномәдени бірлестігінің төрағасы Адам Бойсаев, І. Жансүгіров атындағы Жетісу мемлекеттік университетінің гуманитарлық факультетінің қазақ тілі мен әдебиеті мамандығының І курс білімгері Александр Сон баяндама оқып, Қазақстанға күштеп қоныс аударылған кездегі оқиғаларға тоқталды. Сондай-ақ, естеліктерімен бөлісіп, тағылымды әңгіме өрбітті. Жиын соңында ақпаратты мерзімді баспасөз, телеарналар мен интернет желілерінде жариялап, халыққа жеткізу жолы талқыланды.
Қазақстан Республикасының Президенті Н. Назарбаевтың 2016 жылғы 14 қаңтардағы Жарлығына сәйкес 1 наурызда елімізде Алғыс айту күні атап өтіледі. Осыған орай облыс аумағында арнайы онкүндік жарияланды. Декада барысында «Татулық – бірлік бастауы» атты облыстық форум, БАҚ өкілдерімен Алғыс айту күніне арналған брифинг, Қаратал ауданындағы Бастөбе тауының етегіндегі «Қазақ халқына мың алғыс!» монументінде салтанатты митинг, этномәдени бірлестіктер шығармашылық ұжымдарының «Қарттарым – қазынам» атты қайырымдылық концерті, жалпыреспубликалық «Тату көршілер» акциясы аясында «Қайырымды көршіге рахмет» шарасы, «Медиация орталығының» Ашық есік күндері, білім беру мекемелерінде сынып сағаттары, ашық сабақтар, эсселер, суретшілер байқауы, денсаулық сақтау мекемелерінде «Салауатты ел – болашақ негізі» Ашық есік күндері, этномәдени бірлестіктер жастарының аға буын өкілдерімен «Алғыс арқалаған жандар» тақырыбында кездесулер өткізуі жоспарланған.
Мәулен ӘНЕРБАЙ.
