Облыстық әкімдікте облыс әкімінің бірінші орынбасары Лаззат Тұрлашовтың төрағалығымен дағдарысқа қарсы штаб отырысы өтті. Оған барлық құзырлы органдардың басшылары, әділет, салық, еңбек инспекциясы және құқық қорғау саласы бойынша облыстық прокуратураның жауапты қызметкерлері қатысты.
Негізгі көтерілген мәселе – еңбек шарттарына байланысты кәсіпорындар мен мекемелердің, орта және шағын жеке шаруашылықтардың уақытылы салық, әлеуметтік төлем және зейнетақы жарнасын төлеп тұру мәселесі болды. Жиынды ашып, жүргізіп отырған Лаззат Махатұлы бірінші сөзді облыстық еңбек инспекциясы бойынша басқарма басшысы А. Қонақбаевқа берді.
Басқарма басшысы өткен жылдан бергі істелген жұмысты саралап өтті. Еңбек инспекциясы бойынша басқарма облыстық прокуратурамен бірлесе даулы мәселелерді болдырмау мақсатымен арнайы мониторингтер жүргізген. Жалпы облыс бойынша 50 ірі, 149 орта кәсіпорын қамтылған. Жыл басынан бері еңбек даулары тіркелмеген. Есесіне өткен жылы еңбекақы төлеу мәселесі бойынша біраз заңбұзушылықтар анықталған. Нақтырақ айтқанда әртүрлі меншіктегі 370 кәсіпорын мен ұйымға тексеріс жүргізілген. Оның ішінде 308 жоспардан тыс, 62 іріктеп тексеру арқылы 398 заңбұзушылықты анықтаған. Егер жекелеп айтар болсақ, еңбек қатынастары бойынша 238, еңбек қауіпсіздігі және қорғау бойынша 82, тұрғындарды жұмыспен қамту бойынша 78 заңбұзушылық тіркелген. Осы анықталған олқылықтарға 276 ұйғарым беріліп, жалпы 14,9 млн. теңгеге 186 әкімшілік айыппұл салынды. Өткен жылы 866 арыз түсіп, олардың барлығы қаралып жауаптар берілген. Арыздың басым көпшілігі еңбекақы, еңбек қатынастары, қауіпсіздік мәселелеріне қатысты. Мысалға, 57 мекеме мен кәсіпорынның 1021 қызметкердің алдында 90,4 млн. теңге жалақы қарызы бар. Аталған мекеменің басшыларына 57 ұйғарым беріліп, 9,2 млн. теңге айыппұл салынды. Сонымен қатар банкротқа ұшыраған мекемелер бойынша жалақы қарыздарының өтелмеуі күрделі мәселе күйінде қалып отыр. Еңбекшіқазақ, Іле, аудандары мен Қапшағай, Талдықорған қалаларындағы бірнеше кәсіпорын еңбекақы мен салық төлемдеріне қарыз. Аталған мәслелелер штаб отырысында жіті талқыланды.
Осыдан кейін мемлекеттік кірістер департаментінің өкілі баяндама жасап, бірқатар мәселелердің шетін шығарды. Мәселен, облыс бойынша салық төлеуден жалтарып жүрген кәсіпорындар бар, олармен арнайы құзырлы органдар жұмыс жасап, біразының құжаттары сотқа жөнелтілген. Осыдан кейін зейнетақы мен әлеуметтік төлемдерге де қарыз мекемелердің барлығы айтылды. Осындай күрмеуі қиын жұмыстың оңтайлы шешілуін қадағалаған Лаззат Махатұлы аттарына сын айтылған аудан әкімдерінің орынбасарларына олқылықтың түйінін шешіп, кәсіпорындардың жұмысшылар мен мемлекет алдындағы міндетті төлемдерін төлеуі керектігін тапсырды. Сондай-ақ, мемлекеттік кірістер департаменті мен еңбек инспекциясына да еңбек дауы туындамайтындай деңгейде жүйелі жұмыс атқаруды жүктеді.
Ришад ТҰРҒАНБАЙ.
