Премьер-Министр Бақытжан Сағынтаевтің төрағалығымен үкімет отырысы өтті. Жиын селекторлық режимде өтіп, оған өңір әкімдері қатысты. Негізгі мәселе көктемгі су тасқыны қаупін азайту мәселесіне барынша жауапкершілікпен қарау болды.
Баяндамашы Ішкі істер министрі Қалмұханбет Қасымов көктемгі су тасқынына байланысты бірқатар облыста атқарылып жатқан жұмыстарға тоқталды. Сондай-ақ, кей облыстардағы сақтық шараларының немқұрайлы атқарылғанын да тілге тиек етті. Үкімет басшысы аталған облыс басшыларына ескерту жасап, иесіз су қоймаларын үнемі бақылауда ұстауды тапсырды. Сонымен қатар коммуналдық меншіктегі гидротехникалық нысандарды көктемгі тасқынға дайындау жоспарын әзірлеуді де қадап айтты. Мұнан кейін Ауылшаруашылығы министрінің орынбасары, Энергетика министрі баяндама жасап, сақтық шараларына байланысты мәліметті толық баяндады. Министрлердің айтуынша, көктемгі тасқынға барлық тосқауылдар дайын, сақтық шаралары ретімен атқарылып, ауа райы да қалыпты жағдайда. Осы ретте Премьер-Министр өткен жылы «Қазгидромет» қызметінің жұмысына көптеген сын айтылғанын, осы жұмыстар қалай атқарылды деген сауалға Энергетика министрі «Қазгидромет» қызметінің жұмысы күшейтілгенін және жаңа құрылғылармен жабдықталып, ауа райын нақты беретінін атап өтті. Мәселен, бұған дейін гидрологиялық болжам үш ай бұрын жасалынатын. Ал 1 наурыздан бастап синоптиктер 7 күн бұрын болжам жасап отыратын болады. «Оның дәлдігі 90 пайыздан асып түседі және әрбір үш күн сайын түзетіліп отырады.
Бұдан кейін сөз, өңір басшыларына берілді. Селекторлық жиынға қатысып отырған облыс әкімі Амандық Баталов көктемгі су тасқынына байланысты толық мәліметпен таныстырды.
– Бүгінгі күнде төтенше жағдайдың алдын алу мақсатында арнайы комиссия құрылып, барлық қауіпті мекендер бақылауға алынды. Бүгінгі таңда Алматы облысында ауа райы қалыпты, қар мөлшері өткен жылмен салыстырғанда төменгі нәтижені көрсетіп тұр, су жинау бөгеттеріндегі су деңгейі де нормадан төмен. Сонымен қатар арнайы техникалар сақадай сай, қосымша ерікті жасақ жасақталған, жанар-жағармай қоры да жеткілікті, – деп атап өтті ол.
Жиын соңында Үкімет басшысы Бақытжан Сағынтаев барлық өңірге абай болуды, қауіпті аймақтарды бақылауға алып, төтенше жағдайға тосқауыл қоюды тапсырды.
Ришад ТҰРҒАНБАЙ.
