Аймақта алғаш рет «Patriot Qazaqstan» атты спорттық реалити-шоу ұйымдастырылды. Жобаның финалдық кездесуінде былғары қолғап шеберлері «Жастар» спорт сарайында жұдырықтасты. Облыстық ішкі саяат басқармасының қолға алған тың бастамасына деген өңір басшысы Амандық Баталовтың қолдауы мен ізгі тілегін орынбасары Жақсылық ОМАР жеткізді. Жер-жерден жиналған спортсүйер қауымның қолдауы жігіттерге дем беріп, ойынды одан әрі қыздыра түсті.
Кешке режиссер, каскадер Бауыржан Абишев, публицист Бақытжан Бұқарбай, актер Асылхан Төлепов және Аян Өтепберген қатысты. Елбасының «Болашаққа бағдар: рухани жаңғыру» мақаласы аясында өткізілген жарыста аудан, қалалардан 18-22 жас аралығындағы 16 жас бәсекеге түсіп, мықтылар кезең-кезеңмен іріктелді. Финалдық додада Сарқан ауданының намысын қорғаған Саят Құдайберген үшінші орынды қанжығаласа, екінші орынға Райымбек ауданының тумасы Жақсылық Қырғызәлі табан тіреді. Ал бірінші орынды Қаратал ауданының жас спортшысы Мирас Ертанов жеңіп алды. Сондай-ақ, ол АҚШ-қа жолдама ұтып, Лас- Вегас қаласындағы Фредди Роучтың залында жаттығу мүмкіндігіне ие болды.
– Елімізде жастардың өркендеуіне, білім алуына, спортпен шұғылдануына барлық жағдай жасалған. Сондықтан да біз оларды осындай реалити-шоулармен де қамтамасыз етуіміз керек. Бұл жарыс бірнеше күн бойы өтті. Финалдық ойынды облыстық «Жетісу» телеарнасынан барлық өңір тұрғындары тіккелей эфирде тамашалады. Бұл дегеніміз, бұқаралық спорттың дамуына өзіндік үлесін қосады. Ұйымдастырушыларға облыс басшылығының атынан алғыс айтамыз, – деді Жақсылық Мұқашұлы.
10 жасынан бастап бокспен айналысқан Мирас Ертанов Талдықорған қаласындағы политехникалық колледждің 4-курс студенті. Келешекте дене тәрбиесінің мұғалімі болатын студент: «Жеңісімді Отанмыма, Қаратал ауданына арнаймын. Болшақта да ел намысын қорғап, Қазақстанның атын әлемге танытатын спортшы атануға еңбек етемін», – деп қуанышымен бөлісті. Реалти-шоуда көрермендер арасында лотерия ойнатылып, бірнешеуі дәмханаға сертификат және ақшалай сыйлыққа ие болса, Әсем Әуелбекова есімді қала тұрғыны Түркия еліне екі адамдық жолдама ұтып алды.
– Екі аптаның ішінде ең мықтылар іріктелді. Олар осы уақыт аралығында Талдықорғанның көрікті жерлерімен танысып, ағылшын тілін меңгерді. Айта кету керек, бұл қатысушылардың барлығы кәсіби спорт шеберлері емес, әуесқой спортшылар, – деген облыстық ішкі саясат басқармасының басшысы Рустам Алпысбаев аталмыш жоба жалғасын тауып, келешекте дәстүрлі түрде ұйымдастырылатынын айтты.
Мәулен Әнербай.
