Талдықорған төрінде жастар арасындағы бокстан «Жетісу кубогы» XV халықаралық турнирі басталды. Оған Моңғолия, Қырғызстан, Өзбекстан және Әзербайжан мемлекеттерімен қатар, еліміздің барлық аймағының спортшылары қатысуда.
Турнирдің салтанатты ашылу рәсімі «Жастар» спорт сарайында өтті. 200-ден астам былғары қолғап шеберлері бақ сынасатын байрақты бәсекеге облыс әкімінің орынбасары Жақсылық ОМАР арнайы келіп, құттықтады.
– Мемлекет тарапынан спорттың барлық түрлерінің дамуына, қанат жаюына жақсы жағдай жасалынып келеді. Жыл сайын құрылысы бітіп, пайдалануға берілген спорт нысандары, білікті бапкерлеріміз тәрбиелейтін спортшылардың қатарының көбеюі осыған дәлел. Бокстың қазақ спортында алатын орны айрықша екендігін барлығымыз білеміз. Әлемдік аренада Қазақстанның абыройын асқақтатып жүрген спорттың түрі – бокс, – деп барлық қатысушыларға сәттілік тіледі.
Жарыстың бас төрешісі – Елеусіз Дүйсеков. Сайыс алты күнге созылады. Турнир соңында жеңімпаздар марапатталып, сый-сияпақа ие болады.
Мәулен ӘНЕРБАЙ.
«Жетісу»
