Талдықорғандағы IIД-нің спорт кешенінде облыстық мамандандырылған күзет қызметі басқармасының ұйымдастыруымен отбасы күніне орай күзет қызметкерлерінің арасында «Әкем, шешем және мен» атты отбасылық жарыс өтті. Сайысқа бірінші батальон қызметкерлерінің алты командасы қатысты.
Отбасылық дода «Эстафета», «Доппен секіру», «Жүйріктер», «Көпсайыс», «Кім жылдам», «Мергендер», «Сұрақ жауап» болып жеті кезең бойынша өрбіді. Сайыс қызыққа толы болды. Әсіресе, балдырғандардың жүгіргеніне жұртшылық бәрекелді деп қошеметтеп, жігерлендіріп отырды. Дүйім жұрттың қызу қолдауынан кейін спортшылар барын салып өнер көрсетті.
Жарыс қорытындысы бойынша І орынға 129 балмен «Арлан» тобы 1-полиция батальонының ЖДҚ взводының полицейі полиция аға сержанты М. Болтабектің жанұясы, ІІ орынды 109 балмен «Қыран» полиция аға сержанты Б.Тұрысбековтың жанұясы, ІІІ орынға 105 балмен «Барыс» тобы полиция сержанты О. Тимурұлының жанұясы иеленді. Сонымен қатар, әділқазылар алқасы шешімімен «Үздік әке» атағын 3-взвод командирінің көмекшісі полиция сержанты Д. Турдиев, «Үздік ана» атағына «Бәйтерек» тобының анасы Н. Құдайбергенова, «Үздік бала» атағына «Толағай» тобынан А. Сарыбай қанжығасына байлады. Жеңімпаздар мен жүлдегерлер бағалы сыйлықтар, медальдар және мақтау қағаздарымен марапатталды.
Т. АХМЕТКӘРІМҰЛЫ,
облыстық мамандандырылған күзет қызметі басқармасы мемлекеттік мекемесінің 1-полиция батальоны командирінің орынбасары, полиция капитаны.
