Жетісу орталық стадионында мағынасы зор шара ұйымдастырылды. Жасыл алаңдағы қызықты ойынды тамашалауға келген халықта есеп жоқ. Әсіресе, балалардың қуанышы ерекше. Олай дейтініміз, қаламызда жастар мен жасөспірімдер арасындағы футбол ойыны қарқынды дамып келеді. Әлем бойынша спорттың төресі саналатын футболдың орны ерекше. Сан мыңдаған жанкүйерді өзіне баурап алатын сиқырлы спорт біздің де жанкүйерлер мен балғын футболшылардың жан дүниесін баурап алғандай. Саламатты өмір салтын ұстанып, байрақты бәсекеде облыстың атын шығарып жүрген көптеген футбол командасы бар. Республиканың төрт аймағында орналасқан футбол орталығы Алматы облысында да ашылған болатын. Міне, сол орталықтан түлеп ұшқан жастар Қазақстан премьер-лига сапында өнер көрсетіп жүр. Осы мақсатта жастардың арасында футбол ойынын дәріптеу, жаман әдеттен қашық болу және бір күнді саламатты өмір салтына арнаған Жетісу жері жастар мен жасөспірімдер арасында жолдастық кездесу өткізді. Бұл бәсекеге облыс әкімі Амандық БАТАЛОВ қатысты.
Өңір басшысы Амандық Ғаббасұлы шараға қатыспас бұрын Жетісу футбол клубының ғимаратына бас сұқты. Жуырда ғана күрделі жөндеуден өткен ғимаратты толықтай аралап, оң бағасын берді. Расымен де, футбол мамандарының кеңсесі қайта жаңғырып, сапалы жөндеуден өткен. Ішіндегі кеңселік жиһаздар да жаңадан алынып, жұмысшылардың кемшіліксіз еңбек етуіне қолайлы жағдай туғызған. Екінші қабаттағы кәсіпқой футболшылардың жататын бөлмелері де талапқа сай жасалып, барлық төсек- орындары жаңартылған. Жұмыстың сапалы аяқталғанына толықтай көз жеткізген Амандық Ғаббасұлы клуб директоры Серік Мұқановқа ризашылығын білдірді. Сонымен қатар команданың бас жаттықтырушысы Д. Огайды пәтермен қамтамасыз етуді және клубтың иелігіне жалпы үш пәтер бөлуді орынбасарларына тапсырды. Мұнан кейін облыс әкімі спорттық жейдесін киіп, футбол орталығының командасымен жасыл алаңға шықты. Кездесудің алдында облыс әкімі Амандық Баталов құттықтау сөз сөйлеп, аз-кем спорт саласы бойынша істеліп жатқан жұмысқа тоқталды.
– Мемлекет басшысы Нұрсұлтан Әбішұлы Назарбаев отандық спортты дамыту туралы сөз қозғағанда, балалар спортына үлкен көңіл бөлу қажеттігін үнемі ерекше атап өтеді. Осы бағытта мемлекеттік қолдаудың арқасында нәтижелі істер атқарылуда. Жас жеткіншектердің сүйікті спорт түрімен толыққанды айналысуына жан-жақты жағдай жасалуда. Соның ішінде футболға да зор көңіл бөлінуде. Әлем бойынша миллиондаған адамның сүйікті ойыны саналатын футболмен біздің облысымызда 111 мың адамның айналысатындығы қуантады. Солардың ішінде өздеріңіз сияқты әуесқой жас спортшыларымыз да бар. Сіздердің араларыңыздан болашақта жоғары санатты кәсіби футболшылардың шығатындығына сенімдімін. Баршаңызды спорт күнімен тағы бір мәрте құттықтай отырып, сіздерге жоғары спорттық нәтижелер мен жетістіктер тілеймін. Спортпен шұғылданып, салуатты өмір салтын ұстаныңыздар! – деді Амандық Ғаббасұлы. Құттықтау сөзінен кейін өңір басшысы балаларға 200 футбол добын табыстады. «Жетісу» футбол орталығының жас тәрбиеленушілерінің атынан Бағдәулет Әмірсенов сөз сөйлеп, балалардың сүйікті ісімен айналысуына қажетті мүмкіндіктердің жасалып жатқандығы үшін өңір басшысына алғысын білдіріп, 7 нөмірлі футбол формасын сыйлады.
Салтанатты шарадан ке- йін ойын басталды. Алаңға шыққан екі команда да аянып қалмады. Кескілескен ойында «Жетісу» футбол орталығының жас тәрбиеленушілерінің командасы басымдығын байқатты. Жас болса да ала допты ұршықша иіріп, қарсыластарының қақпасын жиі нысанаға алып отырды. Осындай қауіпті шабуылдардың нәтижесінде жас футболшылар командасы «Жетісу» футбол клубының қосалқы құрамы командасының қақпасын төрт мәрте дәл көздеп, жеңіске жетті. Ал қарсыластар болса, жалғыз доппен жауап қайтарды. Есеп – 4:1.
Ришад ТҰРҒАНБАЕВ.
