Қуан, Алаш! Бөркіңді аспанға атып, еліңнен сүйінші сұра. Жетісудың Демеуі әлем чемпионатының күміс медалін жеңіп алды.
Парижде өтіп жатқан әлем чемпионатында қазақ балуандары тамаша өнерімен айшықталып жатыр. Францияда бозкілемнің шаңын қаққан қазақтың қос ұлы ақтық сынға шықты деген хабарды естігенде төбеміз көкке бір елі жетпей қалды. Шіркін-ай, Алаш баласына саф алтын бұйырса екен деген үміт басым болды. Күрестен әлем чемпионатында қазақ баласына алтын бұйырмағанына да біраз жылдың жүзі болды. 1998 жылы Бақтияр Байсейітовтен кейін алтынның ауылы алыстап, зарығып жүргеніміз баршаға аян. Алтын түгілі ақтық сынға шығудың өзі мұң болды. Сол сары уайымның бұлтын жетісулық Демеу Жадыраев сейілтіп, көңілімізді жадыратты. Ақтық сынға шығып, алтынға қол жеткізе алмаса да арыстандай айбаттанып, қайраттылық көрсетті. Демеудің күмісі дәл қазіргі уақытта алтынмен пара-пар. Оның соңынан Мейрамбек Айнағұловтың да күміске қол жеткізгені біз үшін қуанышты жайт. Тіпті, Айнағұлов рекордтық көрсеткіш орнатты. Қарсыласын 29 секундта алып ұрып, таза жеңіске қол жеткізді. Мамандар ең жылдам істелген әдіс деп бағалады. Алашты қос күмісімен құттықтаймыз!
Әмір Сана.
(Әлем чемпионаты жайлы толық
мақаланы газетіміздің келесі санынан оқи аласыздар).
