Жетісу облысында кісі қолынан қаза тапқан Шерзат Полаттың өліміне қатысты сот отырысы өтуде, деп хабарлайды 7-su.kz желілік басылымы.
Сот барысында Дархан Әскентайдың сыныптасы куәлік берді. Оның айтуынша, Дархан ешқашан ешкімге жамандық жасамаған, сабырлы, төбелеске бейім емес адам болған. Сондай-ақ, 31 жастағы Еркебұлан Тоқтарбай да куәлік етіп, оқиға күні Дарханмен бірге болғанын айтты. Оның сөзіне қарағанда, олар газ қондырғысын жөндеу үшін кездесіп, кейін Дархан сыра әкеліп, Айдын есімді танысымен ішкен. Алайда мас болмаған.
Тақырыпқа орай: «Пышақты Dizzy-мен жуды»: Талдықорғанда Шерзат Полаттың ісі бойынша сотта куәгер оқиғаның мән-жайын баяндады
Еркебұлан Дарханды дүкен маңынан тастап кеткенін және көлікте отырған кезде біреуден ақша сұрағанын, өзі оған көмектескенін жеткізді. Сыныптасының айтуынша, ол болған оқиға туралы тек келесі күні желіден білген.
Сот отырысында адвокаттар куәгерден Дарханның бұрын осындай істерге қатысы бар-жоғын сұрады. Бірақ куәгер бұдан хабарсыз екенін айтты.
Дархан Әскентай – оқиға алдында Қаржаубай дүкенінен сыра алған азамат. Бұған дейін де оның үстінен іс қозғалған, алайда іс сотқа жетпестен тоқтаған. Қазіргі уақытта оның соттылығы жоқ.
Қазіргі уақытта іс бойынша сот отырыстары жалғасуда.
Фото: Жоғарғы сот
