Облыс әкімінің орынбасары Жақсылық Омар кезекті іссапарын Текелі қаласында жалғастырды. Қаладағы бірқатар әлеуметтік нысандарды аралап, халықтың хал-ахуалымен жақынырақ танысты.
Алдымен 400 студентке арналған Текелі кәсіптік колледжіне бас сұғып, бірнеше тапсырмалар жүктеді. Бұл оқу ордасында қазіргі кезде 291 студент білім алып жатыр. Сондықтан аудан, ауылдарды аралап, жарнама жасауды қолға алу керек. Сондай-ақ, дуальды оқыту жүйесін дамытып, колледж бітірген студенттер толығымен жұмыспен қамтылуы тиіс. Оқыту мақсатында жатақхананың кейбір бөлмесін қонақүйге айналдырып, студенттер тәжірибеден өтеді. Жақсылық Мұқашұлы бөлме саны шамадан тыс көп екенін ескертіп, шектеу керектігін айтты. Облысымыздың экономикасына қажетті мамандық ашуды да тапсырды. Күзден бастап талапкерлер саны артса, спорт зал мен жаңа оқу корпусы да салынып қалуы мүмкін. Және де білім ордасына жеке егістік жер мен жылыжай қажет екендігін тілге тиек етті.
Мектепке дейінгі 59 бала тәрбиеленетін №2 псиxологиялық-педагогикалық коррекциялық кабинетін басқа ғимаратқа көшіру мәселесі туындауда. Ескі әрі суық нысанда жыл сайын бала саны артып, мүмкіндігі шектеулі жандардың кіріп, шығуы қиындай түсуде. Сондықтан тез арада лайықты нысан тауып, көшіруді қолға алу керек. Жетісу өлкесі туристік салаға таптырмас жер, тамаша табиғатымызға қызығатындардың саны күн санап артып келеді. Осы саламен Текелі қаласының балалар мен жасөспірімдердің туристік және өлкетану орталығы да айналысады. Алайда жан-жаққа жиі шығатын орталықтың тасымалдау көлігі жоқ.
Облыс бойынша ҰБТ-дан орташа есеппен 96 балл жинаған №3 орта мектеп жүлделі үшінші орында тұр. 283 оқушысы бар білім ордасынан биыл екі “Алтын белгі” күтілуде. Білім сапасы жоғары мектеп тек қана күрделі жөндеуді қажет етеді. Жеке бассейн залы да жұпыны. Білім көрсеткішіне көңілі толған облыс әкімінің орынбасары Жақсылық Омар ғимараттың жақын арада жөндеуден өтетінін жеткізді. Қалалық кітапxана ғимараты да тар болған соң басқа нысанды қажет етуде. Ал қалалық ауруxанадағы терапия мен тіркеу бөлімін де жөндеу керек.
Әлеуметтік сала бойынша Текелі қаласында жағдай қалыпты. Алайда 2015 жылмен салыстырғанда өлім көрсеткіші 3 пайызға өскен. Және де бала туу көрсеткіші аз. Текелі қаласы облыс бойынша ҰБТ-дан 85,4 пайызды көрсетіп, 3-орынға табан тіреген. Келешекте бұл көрсеткіш өсе береді деген ниеттеміз.
32 600 тұрғыны бар Текелі қаласында 2016 жылы жасөспірімдер арасында 138 қылмыс тіркелген. “Бұл үлкен көрсеткіш, айрықша бақылауға алып, қылмыс санын азайтуға күш салу керек. Ал аталған мәселелер қадағалауға алынып, шешілетін болады”, – деді облыс әкімінің орынбасары Жақсылық Омар.
Мәулен ӘНЕРБАЙ
