ҚР ҰҚК шегара қызметі Панфилов аудандық шегара басқармасы оқу-жаттығу үйрету кавалериялық тобының жеке құрамы Екінші дүниежүзілік соғыс ардагерлерінің құрметіне арналған мемориал аумағында сенбілік өткізді.
Іс-шара барысында мемориал маңы абаттандырылып, шегара белгісі, Мемлекеттік Ту және шегара туының ұстынына жеңілдетілген жөндеу жұмыстары жүргізілді. Жарық шамдары қалпына келтіріліп, кешеннің көрінісі жаңартылды.
«Жасыл ел» акциясы аясында ұйымдастырылған сенбілік «Қорғас» шегаралық бақылау басқармасына қарасты «Нұр Жолы» шегаралық бақылау бөлімінде де өтті. Сондай-ақ, Алакөл ауданы бойынша шегара басқармасының 60 жылдық мерейтойына орай «Шолақ» шегара бөлімшесінің аумағында ағаш отырғызу шарасы ұйымдастырылды. Оған шегара қызметінің жеке құрамы мен ардагерлер, жергілікті атқарушы органдар мен білім беру ұйымының өкілдері белсене қатысты. Акция аясында бөлімше аумағына түрлі жеміс ағаштары мен жапырақты ағаштар отырғызылып, жасыл желекке айналатын аумақ қалыптастырылды.
Айдар ҚАЛИЕВ
Фото: freepik
