– Бақыт, қайда барасың?
–Ата-анасын сыйлаған,
Ұйымшылдық ойлаған,
Тату жанға барамын, – деген Қабан жыраудың өсиет сөзі өмірдің мәні сыйластықта екенін білдіреді.
Көксу ауданына қарасты Алғабас ауылында Тастанды атаның ұрпақтары тұрады. Құт қонып, бақ дарыған. Бүгінде әулеттің берекесі – Захан апа 98-ге келді. Екі дәуірдің куәсі. Көргені мен көңілге түйгені көп. Қыз-келіншектердің бет түзер темірқазығы. Апа 11 құрсақ көтерген. Бүгінде немере-шөбересімен бір қауым ел.
Захан Бексейітқызы – бір шаңырақтың үлбіретіп баққан жалғыз қызы. 15 жасынан пошташы болып, ел-жұртқа газет-журнал тасыған. «Кеңес өкіметі кезінде халық оқымысты еді. Кешке отырып соларды сараптағанда атынан шатасатынмын. Ол кездегі адамдардың оқуға, білуге, жаңалыққа жаны құмар еді. Ел күтіп қалмасын деп газет тасуға таң алакеуімдене шығамын»,– дейді апа замандастарының болмысын еске түсіріп.
Захан қыз 1945 жылы Тастанды есімді жігітпен бас қосып, босаға аттайды. Ғибратты ғұмыр кешіп, қос бәйтерекке айналған асқар тау әке мен аяулы ана балаларын өтірік айтпауға, ешкімнің ала жібін аттамауға, адам баласына қиянат жасамауға тәрбиелейді. Енесімен 20 жылға жуық бір шаңырақтың астында тұрған ол, ата жолымен Жақсыбала есімді қызын енесінің бауырына салып береді. Қызы бұл кісіні «жеңеше» деп атап кетеді. Бүгінде сол Жақсыбаланың ортаншы қызы Гүлсараны бауырына салып алған. Гүлсара қазір екі отбасының да шамшырағы. Қос ананың абыройын асырып, үмітін ақтаған ұрпақ. Елдің білім саласы мен бала тәрбиесіне үлес қосуда. Бүгінде облыстық білім басқармасында жауапты қызметте.
Захан апа ер мінезді Гүлсарасының еңбекқорлығына риза. Қос ананың тілеуі мен елдің батасы оған күш-қуат сыйлағандай. Ол өңірде қазақ тілі мәртебесін көтеруге атсалысты.
Күндіз-түні балаларының амандығын тілеген ана «ұзақ жасаудың сыры – ешкімге қиянат қылмауда, үлкен, кішімен сыйласа білуде» деп барша жұртқа ақылын да айтады. Ғасырға табан тіреген сүйегі асыл, ғасыр әжеге Алладан бақуатты ғұмыр тіледік.
Гүлжан ТҰРСЫН
Көксу ауданы
Жетісу облысы
