Ұлттық банк 2025 жылғы 1 сәуірдегі жағдай бойынша екінші деңгейлі банктердің қаржылық көрсеткіштерін жариялады. Статистикаға сәйкес, банктер секторының жалпы таза пайдасы 664 млрд теңгеге жетіп, бір жылда 16,6%-ға артқан. Алайда 21 банк ішінде 8 қаржы ұйымының табысы төмендеген, деп хабарлайды 7-su.kz желілік басылымы.
Табысы кеміген банктердің қатарында ірі ойыншылар да бар
Қаржы секторының жалпы өсімі байқалғанымен, ең ірі банктердің бірі саналатын Jusan Bank-тің таза табысы 5,3 млрд теңгеге азайып, 39,3 млрд теңгені құрады (былтыр – 44,6 млрд).
Еуразиялық банк те табысын жоғалтты – былтырғы 37,8 млрд теңгенің орнына биыл 16,7 млрд теңге ғана тапқан. Бұл – 21,1 млрд теңгеге қысқару.
Freedom Bank те шығынға ұшыраған. Биылғы табысы 19,3 млрд теңгеге азайған.
Табысы азайған басқа банктер:
-
Ситибанк Казахстан – 26 млрд → 20,4 млрд
-
Altyn Bank – 11,6 млрд → 9,8 млрд
-
Шинхан Банк Казахстан – 7,7 млрд → 7,3 млрд
-
Нұрбанк – 2,7 млрд → 1,3 млрд
-
Қазақстан-Зираат халықаралық банкі – 3,8 млрд → 3,7 млрд
Жоғары өсім көрсеткен банктер де бар
Биыл кейбір банктер рекордтық өсімге қол жеткізген. Мәселен, Bereke Bank табысын 29 есе арттырып, 13,2 млрд теңге пайда көрген.
«Заман-Банк» ислам банкі 4,2 млрд теңге табысымен 10,4 есе өсім көрсетсе,
БЦК (ЦКБ) – 78,5 млрд теңге (1,9 есе),
Halyk Bank – 247,1 млрд теңге (1,5 есе),
Kaspi Bank – 128,3 млрд теңге (1,1 есе) табыс тапқан.
Сондай-ақ пайдасы артқан банктер қатарына ForteBank, Bank RBK, Home Credit Bank, Отбасы банк, Қазақстандағы Қытай Банкі, ВТБ Банкі, ADCB ислам банкі, және Қытайдың сауда-өнеркәсіп банкі (ICBC) кіреді.
Саладағы жалпы көрініс қандай?
Банк секторының табысы өсіп жатқанымен, сегіз банктің табысы төмендеуі – нарықтағы бәсеке, несиелеу белсенділігі, пайыздық маржа және шығын құрылымы секілді факторлардың әр банкте әртүрлі әсер етіп жатқанын көрсетеді.
Мамандардың пікірінше, нарықта банктердің тұрақты жұмыс істеуі үшін актив сапасы, цифрлық трансформация мен клиенттік база маңызды рөл атқарады. Ал табысы азайған банктер үшін бұл – бизнес-модельдеріне қайта көз жүгірту қажеттілігінің белгісі болуы мүмкін.
Фото: istockphoto.com
