Облыстық энергетика және тұрғын үй-коммуналдық шаруашылық басқармасы тапсырыс берген жобаның құрылыс-монтаж жұмыстарының негізгі бөлігін «Алматы Production Construction Invest» жауапкершілігі шектеулі серіктестік 1 ай көлемінде толығымен жүзеге асыруды өз мойнына алған. Мердігер компания атынан жобаға жетекшілік жасап отырған Жұмәділ Әбдрахмановтың айтуынша, қазіргі таңда құрылыс алаңында 17 арнайы техника мен 180-ге жуық маман жұмысқа кіріскен.
– Қала көлемінде табиғи газ желілерін тарту жұмыстары жоспарға сай жүріп жатыр. Моноқала тұрғындарының пікірлері мен ұсыныстарын ескеріп, арыз-шагымдарында айтылған ескертулерді реттеп отырмыз. Басты мақсат – жергілікті халыққа кедергі келтірмейтіндей сапалы әрі қауіпсіз құрылыс жүргізу, – дейді Жұмәділ Асқарұлы.
Жұмыс барысын бақылап отырған техникалық қадағалау мамандары да жобаның сапасына баса назар аударуда. «Қабылан эксперт» ЖШС директорының орынбасары Абылай Тоқтамысовтың сөзіне қарағанда құрылыс жұмыстары талапқа сай жүргізіліп келеді.
– Қазір қажетті құрылғылар орнатылып, қауіпсіздік талаптары мен құрылыс нормалары толықтай тексерілуде. Күнделікті бақылау арқылы біз құрылыс сапасын қадағалап отырмыз деп айта аламын, – дейді Тоқтамысов.
Бұл игі бастама тек тұрғындардың тұрмысын жеңілдетіп қана қоймай, тау қойнауындағы кенді қаланың экологиясын жақсартуға, ауаның тазалығын сақтауға үлес қосады. Бұрын көмірден шыққан түтін мен қалдықтар экологиялық ауыртпалыққа себеп болған еді. Енді көгілдір отынның келуімен бұл мәселе шешімін таппақ. Халықтың көптен күткен арманы осылайша ақиқатқа айналып отыр.
Санжар СҰЛТАНҒАЗЫ
