2025 жылдың басынан бері су заңнамасын бұзған тұлғаларға 6,4 млн теңге көлемінде 35 әкімшілік айыппұл салынды. Бұл туралы ҚР Су ресурстары және ирригация министрлігі мәлімдеді.
Министрліктің дерегінше, салынған айыппұлдардың 1,4 млн теңгесі жоспардан тыс жүргізілген тексерулер нәтижесінде тіркелген 12 заңбұзушылыққа қатысты болса, құқық қорғау және мемлекеттік органдардан түскен материалдар негізінде 5 млн теңгеге 23 айыппұл рәсімделген.
Бассейндік инспекциялар жыл басынан бері 13 тексеру жүргізіп, 8 заңбұзушылықты анықтаған. Бұл заңсыз әрекеттерді жою үшін 7 ұйғарым берілген.
Салыстыра кетсек, 2024 жылы су заңнамасын бұзғандарға жалпы сомасы 44,5 млн теңгеге 556 әкімшілік айыппұл салынған болатын. Ол жылы бассейндік инспекциялар 439 тексеру жүргізіп, 1855 заңбұзушылықты анықтаған.
Су ресурстары және ирригация вице-министрі Нұрлан Алдамжаровтың айтуынша, су саласындағы бақылауды күшейту үшін бірқатар құрылымдық және заңнамалық өзгерістер жасалған. 2024 жылы министрлік жанынан Су ресурстарын реттеу, қорғау және пайдалану комитеті құрылып, су инспекторларының саны 98-ден 210 адамға дейін артты.
– Жаңа Су кодексінде бассейндік инспекцияларға бақылау жүргізу құзыреті берілді. Құжат күшіне енгеннен кейін инспекторлар заңбұзушылыққа шұғыл әрекет ете алады. Сонымен қатар, Әкімшілік құқық бұзушылықтар туралы кодекске енгізілген өзгерістер арқылы су саласындағы жауапкершілік те күшейтілді, – деді вице-министр.
