Қазақстанда зейнет жасына жетсе де, мемлекеттік қызметте жұмысын тоқтатпаған азаматтар саны 800-ден асты. Бұл туралы мәжіліс депутаты Болатбек Әлиев Facebook парақшасында жазды. Ол бұл жағдайды ресми деректерге сүйене отырып сипаттап, мұндай тәжірибеге сын айтты, деп хабарлайды Dalanews.kz.
Депутаттың айтуынша, бұл азаматтар министрліктерде, әкімдіктерде, комитеттер мен департаменттерде қызмет атқарып отыр. Олардың барлығы зейнет жасына қарамастан, жұмысын «өзара келісім» негізінде жалғастыруда. Әңгіме, негізінен, әкімшілік мемлекеттік лауазым иелері туралы болып отыр. Мұндай келісімшарттар жыл сайын жаппай ұзартылуда.
— Құжат жүзінде бұл тәжірибе тәжірибеге құрмет көрсету ретінде көрінуі мүмкін. Бірақ көп жағдайда мұндай шешімдер ерекше құзыреттілікпен немесе кадр тапшылығымен емес, бірінші басшының жеке шешімімен, кейде сырттан келген өтініштер мен тапсырмалармен байланысты, — деді Әлиев.
Ол кейбір қызметкерлердің «ерекше маман» ретіндегі негізсіз сипаттамамен қызметте қалып жатқанын сынға алды.
Кейбір министрліктер мен облыстарда көрсеткіш жоғары
Зейнет жасындағы қызметкерлер ең көп жұмыс істейтін министрліктер мен өңірлер де аталды:
-
Қаржы министрлігі – 89 адам
-
Денсаулық сақтау министрлігі – 73
-
Ауыл шаруашылығы министрлігі – 43
-
Ақмола облысы – 53
-
Павлодар облысы – 37
-
Қарағанды облысы – 34
-
Қостанай облысы – 32
-
Абай облысы – 35
— Неге дәл осы өңірлерде және құрылымдарда зейнеткерлерге жүктеме ең жоғары? Бұл жай ғана сәйкестік пе, әлде ешкім жауапкершілік алғысы келмейтін басқарушылық шешім бе? — деп сұрақ қойды депутат.
Квазимемлекеттік сектордағы күрделі жағдай
Болатбек Әлиев квазимемлекеттік секторда жағдай одан да күрделі екенін атап өтті. Мұнда жасы мен қызмет өтіліне қатысты шектеулер жоқ. Ұлттық компанияларда, КМК, РМК, холдингтер мен қорларда зейнеткерлер лауазымда мерзімсіз отыра алады.
— Бұл жүйеде он жылдап бір орында отыратын қызметкерлер бар. Олар басшылыққа «ыңғайлы» адамдар болғаны үшін ғана орнын сақтап отыр. Бұл — айналмалы, жабық кадр жүйесінің қалыптасуына жол ашуда, — деді депутат.
Ол сондай-ақ мемлекеттік құрылымдарда цифрландыру, реформа, кадрлық резерв жайлы жиі айтылатынын, алайда шын мәнінде жаңашылдықты меңгере алмай отырған қызметкерлердің әлі де басым екенін жеткізді.
Кадрлық әділеттілік пен реформа қажеттілігі
Депутат мемлекеттік жүйе әділетті болуы тиіс екенін алға тартып, бірегей құзыреті жоқ, тек «ыңғайлы» қызметкерлердің орнын жастарға босатуы қажет екенін айтты.
— Қабілетті жастар жол таба алмай, шетелге кетіп жатыр. Себебі олар әлсіз емес — оларға жол ашылмаған, — дейді Әлиев.
Оның айтуынша, бұл мәселе кезең-кезеңімен депутат басқаратын комитеттің бақылауына алынады. Әрбір министрлік пен әкімдікте зейнет жасындағы қызметкерлердің не себепті келісімшартпен қалдырылғаны анықталмақ. Сондай-ақ депутат Мемлекеттік қызмет істері агенттігімен бірлесе отырып, нақты шешімдер қабылдау қажеттігін айтты.
— Бұл — нақты кадрлық реформа. Жалаң ұран емес. Егер жүйе жаңармай қалса — іштен іри бастайды. Бұған жол беруге болмайды, — деп түйіндеді Болатбек Әлиев.
