Күніне 10 000 қадам жүру ұстанымы салауатты өмір салтының негізі ретінде көпшілікке кеңінен таныс. Бұл көрсеткіш денсаулықты сақтау мен белсенді өмір салтын ұстануға деген ұмтылыстың символына айналды. Бірақ, осы ұсыныс қаншалықты ғылыми негізделген және ол әр адамның денсаулығына пайдалы ма? Бұл сұраққа жауап беру үшін мамандардың пікірін тыңдауға болады, деп хабарлайды 7-su.kz желілік басылымы.
10 000 қадамның шығу тегі
Бұл ұстаным алғаш рет 1965 жылы Жапонияда пайда болды. Жапон инженерінің ойлап тапқан қадам санағышы «Манпо-Кэй» (jap. manpo – 10 000, kei – өлшеуіш) деп аталды. Сол кезден бастап бұл сандар салауатты өмір салтының бір бөлігіне айналды. Қазіргі уақытта бұл ереже бүкіл әлемде кең таралған.
Ғылыми зерттеулер нәтижелері
Зерттеулер көрсеткендей, күніне 10 000 қадам жүру адамның жүрек-қан тамырлары жүйесін жақсартып, салмақты бақылауға көмектеседі. Алайда соңғы уақытта ғалымдар бұл көрсеткіштің бәріне бірдей пайдалы емес екенін алға тартты. Гарвард университетінің зерттеулеріне сәйкес, 4 400 қадам жүрудің өзі денсаулыққа тиімді болуы мүмкін. Ал 10 000 қадамнан кейін пайда айтарлықтай өзгере қоймайды.
Денсаулық саласындағы сарапшылардың пікірінше, бұл көрсеткіштердің жасқа, физикалық жағдайға, және жалпы денсаулыққа байланысты өзгеретінін ескеру керек. Мысалы, жүрек аурулары, буын немесе басқа да созылмалы аурулары бар адамдар үшін жоғары белсенділік денсаулыққа зиян келтіруі мүмкін.
Артық жүктемеден аулақ болыңыз
Егер сіз күніне 2 000-3 000 қадам жүретін болсаңыз, бірден 10 000 қадамға көшу денеге артық жүктеме түсіруі мүмкін. Дәрігерлер бұл процессті біртіндеп бастауға кеңес береді. Қарапайым әрі тиімді ұсыныс – аптасына 5 күн, әр күні кемінде 30 минуттық серуендеу.
Денсаулықты жақсарту үшін қозғалыс маңызды
Ең бастысы – күнделікті дене жаттығуларын жасау. Қадам санынан бұрын қозғалыстың тұрақтылығы мен жүйелілігі маңызды. Мысалы, 3 000-4 000 қадамды да тұрақты түрде жүру нәтижелі болуы мүмкін. Қадам санынан гөрі, белсенділікті ұлғайту мен қозғалыс режимін сақтау денсаулыққа анағұрлым тиімді әсер етеді.
Күніне 10 000 қадам жүрудің пайдасы ғылыми тұрғыдан анықталған, алайда бұл барлық адамдар үшін міндетті емес. Белсенді өмір салтын ұстану үшін қозғалыс пен физикалық белсенділік деңгейін өз ағзаңызға бейімдеп, денсаулығыңызға зиян келтірмей, үйлестіре білу керек.
Егер сізде денсаулыққа қатысты күмәндер болса, кез келген жаңа жаттығу режимін бастамас бұрын дәрігермен кеңескен жөн.
Фото: elcordillerano
