ТАЛДЫҚОРҒАН – 17 сәуір, 2025 жыл. Шерзат Полаттың өліміне қатысты өтіп жатқан сот процесінде қорғаушы тарап сот отырыстарын Алматы қаласында өткізуді немесе егер бұл мүмкін болмаса, адвокаттардың онлайн қатысуын қамтамасыз етуді сұрады. Бұл туралы Талдықорғанда өткен кезекті сот отырысында белгілі болды.
Қорғаушылардың айтуынша, Талдықорғанға келіп-кету қиын әрі жол шығындары жоғары, бұл тарап үшін қолайсыздықтар туғызуда. Адвокаттар процесс ашық және әділ өтуі үшін техникалық мүмкіндіктерді пайдалана отырып, сотқа онлайн режимде қатысуға мүмкіндік берілуін сұрап отыр.
Алайда, бұл талапқа жауап ретінде іс бойынша төрағалық етуші судья Ержан Жанұзақов сот отырыстарының бұған дейін белгіленгендей Талдықорған қаласында, бейсенбі және жұма күндері өтетінін мәлімдеді. Ол:
«Сот отырыстары белгіленген тәртіппен Талдықорған қаласында өтеді. Қорғаушылардың кейбірінің келмей қалуы сот процесінің жалғасуына кедергі болмайды. Сот белгіленген кестеге сай жалғаса береді,» – деп атап өтті.
Жанұзақовтың мәлімдемесіне қарағанда, соттың ауысуы жоспарланып отырған жоқ және сот процестері тұрақты кестемен жалғасатын болады. Қазіргі таңда бұл іс бойынша 11 адамға айып тағылған, олардың барлығы тергеу изоляторында қамауда отыр.
Сот процесі қоғамда ерекше назарда. Отырыс ашық форматта өтіп, онлайн трансляция арқылы көрсетіліп келеді.
Тақырыпқа орай: Шерзат Полаттың өліміне қатысты соттың трансляциясы
«Жетісу-Ақпарат»
Фото: ulysmedia.kz
