Тіл сарайында өткен жиында облыс бойынша төтенше жағдайлар департаментінің жұмыстары тыңдалып, көктемгі науқанның қалай жүріп жатқаны баяндалды.
Отырысқа облыстық департамент пен басқармалардың басшылары және аудан, қала қоғамдық кеңестерінің төрағалары шақырылды. Жиынға облыстық қоғамдық кеңес төрағасы Әсет Қыдырманов төрағалық етіп, сөзді облыстық төтенше жағдайлар департаментінің басшысы Нұрлан Бекбосыновқа берді. Нұрлан Сәкенұлының айтуынша, жыл басынан аймақта табиғи және техногендік сипаттағы ірі және резонанстық төтенше жағдайлар тіркелмеген. Өрттің алдын алу мақсатында ауқымды жұмыстар жүргізілуде. Табиғи өрттерді ерте және уақытылы анықтау үшін ғарыштық мониторинг пен авиациялық техника белсенді пайдаланылуда.
Профилактикалық жұмыстармен облыстағы барлық жеке тұрғын үйлер қамтылған. Халықтың әлеуметтік осал топтары тұратын үйлерге улы газ анықтау датчиктері орнатылған. Қазіргі кезде табиғи өрт қаупін төмендету мақсатында белсенді жұмыс жүруде. Осы бағытта құрылған мобильдік топтар ормандарда рейдтік іс-шараларды бастаған. Былтыр қаупі мол кезеңде қабылданған профилактикалық іс-шаралар орман өрті санын 29, дала өртін 14 пайызға қысқартуға мүмкіндік берген. Нәтижесінде материалдық залал 2 есеге төмендеген.
Өз кезегінде көктемгі дала жұмыстары бойынша мәлімет берген облыстық ауыл шаруашылығы басқармасының басшысы Нұрдәулет Кененбаев көктемгі дала жұмыстары жоспарға сай жүріп жатқанын және оның барысы тұрақты бақылауда екенін айтты. Оның айтуынша, биыл ауылшаруашылығы дақылдарының егіс алқабын 510,7 мың гектарға жеткізу жоспарланыпты. Егіс алқаптарын әртараптандыру шеңберінде бидай 2,9 мың гектарға, қант қызылшасы 1,5 мың гектарға, дәндік жүгері 1,1 мың гектарға қысқарса, арпа 5,5 мың гектарға, майлы дақылдар 1,2 мың гектарға, картоп 309 гектарға, көкөніс-бақша дақылдары 268 гектарға ұлғайған.
Бүгінгі күнге ауыл шаруашылығы дақылдары 26,9 мың гектарға себілген, оның ішінде дәнді, майлы дақылдар, көпжылдық және біржылдық шөптер мен қант қызылшасы бар. Сондай-ақ, тексеруге жататын 9,5 мың тонна майлы дақылдар тұқымының 6,8 мың тоннасы зертханалық тексеруден өтіп, 3,1 мың тонна, оның ішінде 1,0 мың тн/30,3% I класқа, 1,7 мың тн/56,3% II класқа, 0,4 мың тн/13,4% – III класқа жатқызылған. Қант қызылшасын 12,2 мың гектарға себуге барлығы 17 мың себу бірлігі дайындалып, қазіргі уақытта шаруашылықтарға таратылуда.
Бүгінде қант қызылшасы тұқымын себу басталып, жұмыстар жалғасуда және ол мамыр айының 10-ына дейін аяқталады деп күтіліп отыр. Минералды тыңайтқыштармен қамтамасыз ету бойынша шаруашылықтар биылға жоспарлаған 59 мың тонна тыңайтқыштың 66,8 пайызын сатып алған. Қоймаларда 7,0 мың тонна минералды тыңайтқыштар бар.
Арзандатылған дизель отыны бойынша наурыз-сәуір айларына қарастырылған 3360 тонна дизель отынының 2058 тоннасы операторлармен сатып алынып, 58 шаруашылыққа 591,8 тонна дизель отыны жеткізілген. Көктемгі дала және егінді жинау жұмыстарына аграрлық несие корпорациясы арқылы 14,3 млрд. теңге несие қарастырылған. Бүгінгі күнге 227 шаруашылықтан 5,5 млрд. теңгеге өтінімдер қабылданып, 107 шаруашылыққа 3,0 млрд. теңге несие берілген.
«ҚазАгроҚаржы» АҚ арқылы жаңа ауыл шаруашылығы техникасын лизингке алуға 8,5 млрд. теңге қаражат бөлінген. Бүгінгі күні 176 шаруа қожалығынан 4,2 млрд. теңгеге 261 бірлік техника алуға өтінім түсіп, 1,0 млрд. теңгеге 51 шаруа қожалығымен 78 техника алуға келісімшарт жасалған.
Айгүл БАЙБОСЫНОВА
