Президент өз сөзінде қазіргі әлемдік ахуалдың өзгеріп жатқанын атап өтіп, жаһандық тұрақсыздық пен белгісіздік жағдайында мемлекеттердің жауапкершілігі арта түсетінін жеткізді.
Жаһандық қауіпсіздікке төнген қатерге тек геосаяси сипат тұрғысынан қарамау керек. Мұны мойындаған жөн. Әлемде мультилатерализмнің үні бәсеңдеп, протекционизм күшейіп келеді. Осындай бей-берекет кезеңде біздің басты міндетіміз – ынтымақты сақтау және ыдыраған тұстарды қалпына келтіру, — деді Мемлекет басшысы.
Тоқаевтың айтуынша, Қазақстан әлемдегі күрделі ахуалға сындарлы ықпалдастық арқылы жауап беруді құп көреді. Сыртқы саясатта бейтараптық пен диалогқа бейімділік – басты ұстаным.
Біз жікке бөлінбей, кез келген елдің егемендігін құрметтеу қағидатын басшылыққа аламыз. Әсіреұлтшылдыққа, өзге халықтардың тарихы мен мәдени дәстүрлерін менсінбеуге жол беруге болмайды. Аз халықтардың ана тілінде сөйлеуіне, төл мәдениетін насихаттауына құрметпен қарау қажет. Осыған орай Қазақстанда «Бірлігіміз – әралуандықта» қағидатын қатаң ұстанамыз, — деді Президент.
Мемлекет басшысы форум аясындағы сөзінде Қазақстанның тарихи тәжірибесіне де тоқталып өтті. Ол елдің 450 ядролық сынақтың зардабын тартқанын, соған қарамастан бейбіт бастамаларға үн қосып келе жатқанын еске салды.
AIF-2025 форумы әлемде геосаяси шиеленістер күшейген тұста өткізіліп отыр. Ауқымды шара жаһандық диалог пен ынтымақтастықты нығайтуға бағытталған. Форум аясында экономикалық даму, климат өзгерісі, энергетика, қауіпсіздік және халықаралық қатынастар сынды маңызды тақырыптар талқылануда.
Дереккөз: baq.kz
