Балпық би ауылында «Асылхан – Ади» балабақшасы пайдалануға берілсе, Айнабұлақ ауылдық округіне қарасты ПЧ-45 ауылында балаларға арналған жаңа ойын алаңы ашылды. Осылайша аудан тұрғындарының қуанышы еселенді.
Жаңа балабақшаның ашылу салтанатына аудан әкімі Дәулет Халелов қатысып, тұрғындардың қуанышына ортақтасып, ақжарма тілегін арнады.
– Балалар – еліміздің болашағы. Ал болашағымыздың жарқын болуы үшін бүлдіршіндердің саналы тәрбие мен сапалы білім алуы қажет. Бұл ретте білім беру ұйымдарының қажетті мамандармен және құрал-жабдықтармен қамтылуы аса маңызды. Балабақшаның жұмысына сәттілік тілеймін. Осы балабақшадан еліне елеулі, халқына қалаулы азаматтар өсіп, ел намысын қорғай берсін, – деді аудан басшысы.
Мереке балабақша ұжымы мен оған қабылданған бүлдіршіндер ұйымдастырған концертпен жалғасты.
Облыс аумағында Қазақстан азаматтарының білім алу құқығын сақтауға, оның ішінде, мектепке дейінгі білім беруді жүзеге асыруға жіті назар аударылады. Өңірде 3-6 жас аралығындағы балаларды мектепке дейінгі тәрбиемен қамту көрсеткіші 90 пайызға жетіп, республикадағы алдыңғы қатарлы аймақтардың біріне айналды. Қазіргі таңда сапалы және бәсекеге қабілетті мектепке дейінгі білім беруді қамтамасыз ету үшін балабақшаларда ваучерлік қаржыландыру енгізілуде.
Алақандай ғана ауылдың балалары енді өздерінің бос уақыттарын жаңа әрі қауіпсіз ойын алаңында өткізеді. Ойын алаңына жиналған балаларды мерекемен құттықтаған аудан әкімінің орынбасары Серік Дүйсебайұлы арнайы сыйлықтар табыстады.
Жалпы ауданы 861 шаршы метрді құрайтын ойын алаңына аудандық бюджеттен 21 миллион теңге қаражат бөлінген. Заманауи стандарттарға сай салынған бұл нысан ауылдың кішкентай тұрғындарына ерекше қуаныш сыйлады. Ойын алаңының құрылысын «НацСтройЛидер» ЖШС жүргізді. Жауапты мекеме құрылыс жұмыстарын мерзімге сай сапалы аяқтап, ресми түрде қолданысқа берді.
Көксу ауданы әкімдігі балалардың жарқын болашағы үшін осындай маңызды жобаларды алдағы уақытта да жүзеге асыра бермек.
Еңлік кенеБАЙ
Көксу ауданы
