Al Jazeera телеарнасы Қазақстан жайлы деректі сериялар түсіруді жоспарлап отыр. Бұл туралы Қазақстан Президентінің баспасөз хатшысы Руслан Желдібай мен Al Jazeera арнасының жетекшілері арасында өткен кездесу барысында мәлім болды, деп хабарлайды 7-su.kz желілік басылымы.
Кездесу барысында Al Jazeera медиа институтының директоры Иман Әл Әмри мен Al Jazeera English телеарнасының басқарушы директоры Исса Әли Қазақстан туралы ауқымды деректі жобаларды жүзеге асыру жайында ұсыныс білдірді. Жобалар еліміздің бай тарихы, табиғи мұрасы және қазіргі даму қарқыны туралы сыр шертетін болады.
Сонымен қатар, журналистер мен сала мамандарын даярлау мәселесі де талқыланды. Al Jazeera-ның кәсіби тәжірибесі Қазақстандық БАҚ өкілдері үшін маңызды тәжірибе алаңы болмақ.
Руслан Желдібай өзінің Telegram парақшасында:
«Кездесуде елімізде Al Jazeera арнасының тілшілер қосынын ашу мәселесі де қозғалды. Егер медиакорпорация Қазақстанда тұрақты өкілдігін ашса, бұл Қазақстан мен бүкіл Орталық Азия өңіріндегі маңызды оқиғалар туралы халықаралық аудиторияға сапалы әрі өзекті ақпарат тарату мүмкіндігін кеңейтер еді,» – деп жазды.
Айта кетейік, Қасым-Жомарт Тоқаевтың Қатар мемлекетіне өткен жылғы ресми сапары барысында Қазақстан Президентінің Телерадиокешені мен Al Jazeera арасындағы ынтымақтастық туралы меморандумға қол қойылған болатын.
Фото: network.aljazeera.net
