Алматы қаласының әкімі Ерболат Досаев әл-Фараби атындағы Қазақ ұлттық университетінің ғылыми—инновациялық хабында ұйымдастырылған форумға қатысып, университет ұжымымен жүздесті.
Қала басшысын университет ректоры Жансейіт Қансейітұлы Түймебаев өзі қарсы алды.
Ерекше атап өтерлік жайт – әкімнің жоғары оқу орындарына алғашқы ресми сапары дәл осы Қазақстан ғылымының қара шаңырағы – ҚазҰУ-ден басталғаны. Форум аясында университет ректоры қала әкіміне ҚазҰУ-дің Орталық Азия мен ТМД кеңістігінде беделді ғылыми орталық ретінде қалыптасып келе жатқанын атап өтті. Сонымен қатар, соңғы жылдары университеттің Ташкент, Бішкек және Омбы қалаларында ашылған шетелдік филиалдары туралы да мәлімет берді.
QS халықаралық рейтингі бойынша ҚазҰУ әлемнің үздік 200 университетінің қатарынан тұрақты орын алатыны – оқу орнының сапалы білім беруі мен ғылымдағы жетістіктерінің нақты дәлелі. Мұндай биік нәтижелерге жетуде профессор-оқытушылар құрамының тынымсыз еңбегі мен ғылыми ізденістерінің маңызы зор екені де айтылды.
Форум барысында Ерболат Досаев университет қабырғасында жүргізіліп жатқан игі істерге жоғары баға беріп, ректорға, оқытушылар мен студенттерге ғылыми ізденістер мен шығармашылық табыстар тіледі.
Шара жоғары деңгейде ұйымдастырылып, қатысушылардың ризашылық көңіл күйі мен көтеріңкі рухынан байқалды.
Куаналиева Г.А.,
Әл-Фараби атындағы ҚазҰУ Кеден, қаржы және
экологиялық құқық кафедрасының меңгерушісі,
з.ғ.д., профессор
