Көкжиде ауылының байырғы тұрғыны Жанатбек Құрмашев 2018 жылы мал шаруашылығымен айналысу мақсатында немересі Ерзаттың атына шаруа қожалығын құрады. Қазіргі таңда шаруашылықтағы мал басы біртіндеп өсіп келеді. Атап айтқанда 500 бас қой-ешкінің 350-і саулық, 130 бас ірі қараның 80-і сауын сиыр, 60 бас жылқының жартысынан астамы бие. Малды өз төлі есебінен көбейтіп, төрт түліктің санын арттырып, осы саланың игілігін көруге мүмкіндік бар.
Сарқан ауданының Құрметті азаматы Жанатбек Молдабайұлы осыдан 70 жыл бұрын Көкжиде ауылында дүниеге келген, негізгі қызметі Лепсі өңірінде өтті. Жарты ғасырдан астам уақыт бұрын мектеп бітірген бір топ жас кезінде Көкжидеде комсомол-жастар бригадасын құрған болатын. Жанатбек ағамыз сол бригаданың жетекшісі болып әкесінің ақ таяғын ұстайды. Араға жылдар салып Алматы малдәрігерлік институтын бітірген жас маман біліктілігі мен білімділігінің нәтижесінде қызмет бабында сатылап өсіп, ұжымшар директоры болғаны жерлестерінің есінде. Шаруашылық тарағаннан кейін екінші жоғары білім алып, Бөрлітөбе орман шаруашылығы кәсіпорнын басқарды. Зейнетке шыққан соң атакәсіпті жандандыруға бел буды.
Шаруашылық басшысының айтуынша, ауылдық жерде жұмысшы, әсіресе малшы тұрақтамайды. Соның салдарынан жұмыстың ебін, істің тетігін білетін маман тапшы. Былтыр бір трактор, бір шөп тайлағыш сатып алыпты. Қажетті техникамен толық қамтуды мақсат тұтқан шаруашылық иелері биыл шөп шапқыш алуды жоспарлап отыр.
«Мал баққанға бітеді» демекші, көктем мезгілінде шаруалар көктеуге шығып, төрт түлігін төлдетуде. Маңдай тер мен еселі еңбектің арқасында атакәсіп жанданып, жыл сайын оң нәтиже көрсетуі қуанарлық жағдай.
Жақсылық ЖОМАРТҰЛЫ
Фото: gov.kz
