Сарыөзек ауылында «Жанашыр Жүрек» республикалық халықтық қайырымдылық акциясы өтті.
Мақсат – халықтың әлеуметтік осал топтарына көмек көрсету. Шараны аудандық ТЖБ Сарыөзек ауылы №9 ӨСБ және Қоғалы ауылы №17 ӨС бекеті қызметкерлері ұйымдастырды. Акция аясында Сарыөзек ауылының тұрғыны Марат Ерболатовтың үйіндегі жылу пеші мен көмір қышқыл газына қарсы датчигі тексеріліп, отыны жарылды, ауласы мен су арығы қоқыстан тазартылды. Марат Ерболатов датчиктерге аптасына бір рет тексеру жүргізілетінін айтып, осындай игі істері үшін аудандық төтенше жағдайлар бөлімінің қызметкерлеріне ризашылығын білдірді.
– Жақсылық жасау қоғамға көзқарасты өзгертеді. Өйткені адамдар бір-біріне мейірімді, өз әрекеттері үшін жауапты болады, – дейді аудандық ТЖБ инженері, азаматтық қорғау аға лейтенанты Санжар Жақсылықбаев. Айтуынша, ауданда 10 626 тұрғын үй және 1 010 әлеуметтік осал топ санатына кіретін отбасы бар. Марат Ерболатов ІІ-топтағы, зайыбы ІІІ-топтағы мүмкіндігі шектеулі жандар. Сол себепті олар әлеуметтік осал топ тұрғындар тізімінде бар.
Айта кетейік, акция барысында ауданға қарасты елді мекендердегі 200 отбасыға көмек көрсетілген. Нәтижесінде үй иелерінің пештері тазартылып, ескерту жұмыстары жүргізілген. Жергілікті әкімшіліктің демеушілігімен биыл 1500 дана көмір қышқыл газына қарсы датчикке сұраныс берілген.
Айгүл Байжұмақызы
Фото: maqat-tynysy.kz
