Талдықорған қаласының әкімі Ернат Бәзіл шаһардағы Көктем және Бірлік шағын аудандарының тұрғындарымен жүздесті.
Кездесу барысында Ернат Дүйсенбекұлы аталған аумақтағы халықтың көгілдір отын, көше шамдарын орнату және тұрғын үйлерге қатысты сұрақтарына жауап берді. Осы орайда қала басшысы бірқатар мәселелер қатаң бақылауға алынып, кейбір мердігер ұйыммен жобалар қайта қаралатынын жеткізді.
– Бүгінде облыс орталығындағы жаңадан ірге тасы қаланған аудандарда әлі де шешімін таппаған түйткілді түйіндер бар. Оларды шешу үшін қазір жүйелі жұмыстар жүргізіліп жатыр. Бүгінгі тұрғындардың өтініштерін басты назарға алып, бірқатар мәселелерді оңтайлы шешуді көздеп отырмыз. Соның ішінде Көктем және Бірлік шағын аудандарын көгілдір отынмен қамтау ісі. Бұл мәселе қала әкімдігі тарапынан толық қолдау тауып, тұрғындар жыл соңына дейін көгілдір отынмен толық қамтылатын болады,– деді шаһар басшысы.
Еске сала кетсек, Жетісу облысы бойынша табиғи газбен қамту жұмыстары осыдан бірнеше жыл бұрын қолға алынып, құбыр тарту ісі кезең-кезеңге бөлініп атқарылып келген болатын. Негізі 2025 жылдың соңына қарай облыс орталығына қарасты барлық елді мекендерді көгілдір отынмен тегіс қамту көзделген. Осыған байланысты бұған дейін Талдықорған қаласы аумағындағы Жастар-1, Жастар-2 және басқа да шағын аудандар мен Ынтымақ, Мойнақ ауылдарына газ жеткізу жұмыстары сәтті аяқталған еді. Мұндай жұмыстар әлі де жалғасуда. Қазіргі уақытта өткен жылдың тамыз айында басталған Талдықорған – Үшарал магистральдық газ құбырын салу бойынша ірі инфрақұрылымдық жобасы жүйелі түрде жүзеге асырылуда. Аталған жоба аясында өңірдегі Ақсу, Сарқан және Алакөл аудандарымен олардың аумағындағы әрбір ауыл, елдімекендер тегіс көгілдір отынмен қамтылмақ.
Айдын КӘЛІМХАН
