Талдықорған қаласындағы «ZHETYSU INVEST» компаниясы жақында Қытайдың Үрімші қаласында аяқталған «Қытай-Еуразия» халықаралық EXPO көрмесінде табысты жұмыс атқарды.
Іс-шара шетелдік инвестицияларды тарту және халықаралық ынтымақтастықты нығайту үшін маңызды алаңға айналды. «ZHETYSU INVEST» ЖШС директорының орынбасары Ержан Атамқұлов Жетісудың ауқымды инвестициялық және сауда-экономикалық әлеуетін ұсынған делегацияны басқарды. Ауқымды іс-шараға қатысу аймақ үшін жаңа көкжиектер ашуға мүмкіндік берді. Көрме іскерлік байланыстар орнатуға және перспективалы жобаларды талқылауға тамаша жол ашты.
Ержан Атамқұлов Қытайдан келген әлеуетті инвесторлармен және Үрімші сауда-өнеркәсіп палатасының өкілдерімен белсенді келіссөздер жүргізді. Әсіресе «Қорғас» шекара маңы ынтымақтастығы халықаралық орталығы аясындағы логистикалық бастамаларды талқылауға ерекше назар аударылды. Көрмеде аймақтың ауыл- шаруашылығындағы кең мүмкіндіктері ұсынылды. Соның ішінде жоғары сапалы өнім өндіру, өңдеу және экспорттау мәселелері болды. Сондай-ақ, заманауи технологияларды енгізу әлеуеті де аталып өтті.
Логистика бойынша Ұлы Жібек жолындағы Жетісудың стратегиялық географиялық жағдайы ескеріле отырып, аймақ маңызды көліктік-логистикалық торап ретінде ұсынылды. Бұған қоса көлік инфрақұрылымын жақсарту және халықаралық сауда байланыстарын нығайту жолдары талқыланып, жаңа өндірістік қуаттар мен жұмыс орындарын құруға ықпал ететін ауылшаруашылығы шикізатын өнеркәсіптік өңдеудің жоғары әлеуетіне назар аударылды.
Көрмеге қатысу нәтижелері күткеннен асып түсті. Бірлескен жобаларға қызығушылық танытқан бірқатар қытайлық компаниялар және инвесторлармен байланыс орнатуға мүмкіндік туды. Жетісу инвестициялық портфеліне қызығушылық танытқандар мен әлеуетті серіктестер аймақ экономикасының түрлі саласына бірлескен инвестициялардың мүмкіндіктерін қарастыруға дайын екендерін білдірді. «Қытай-Еуразия» EXPO-ға қатысу Жетісудың халықаралық ынтымақтастық пен инвестициялар тарту үшін перспективалы аймақ ретіндегі мәртебесін растады. «ZHETYSU INVEST» ЖШС осы бағытта белсенді жұмысын жалғастыратын болады.
А. Байжұмақызы
