Сарқан ауданы бойынша төрт түліктен өсім байқалады. Өңірде биыл 30239 бас сиыр болса, одан 9762 бұзау алынған. Ал, 69150 қой мен ешкіден 25600 бас қозы-лақ өрбіген. Сондай-ақ, 228 түйенің соңынан 90 бас бота, 12931 бас жылқыға 2700-ден астам құлын ерді.
Бірлік ауылында орналасқан «Смагулова Р.» шаруа қожалығы 1997 жылы құрылып, содан бері мал шаруашылығын дамытуға атсалысып келеді. Қазіргі таңда аталған шаруашылықтағы 400 бас аналық қойдың 150-і тоқты екен. 50 бас жылқы құлындаған. Негізі бұл шаруашылықта мал басының төлдеуі наурыздың 15-нен басталған.
– Биыл малдың қоңы жақсы. Қыста жайлы, жемшөп жеткілікті болды. Төлдету науқаны да ретімен орындалып, төрт түлігіміздің саны артып келеді, – дейді шаруашылық басшысы Басқанбай Смағұлов.
Осылайша аудан шаруашылықтарында ертеңгі күннің негізі қалануда.
Жақсылық Игіман
Фото: seykhuninfo.kz
