2025 жылғы 1 тамыздағы жағдай бойынша жастар практикасы аясында 9,1 мың қазақстандық тұрақты жұмысқа орналасты. Жыл соңына дейін бұл бағдарлама арқылы 38,9 мың жас маманды жұмыспен қамту жоспарланып отыр.
Бағдарлама қатысушыларының ең көбі Түркістан облысында – 2,1 мың адам, Жамбыл облысында – 802, Қызылорда облысында – 775 және Шымкент қаласында – 665 адам тіркелген. Қатысушылардың 62,7%-ын (5,4 мың адам) әйелдер, 58,1%-ын (5 мың адам) ауыл тұрғындары құрайды.
Жастар практикасы – білім беру ұйымдарының 35 жасқа дейінгі жұмыссыз түлектеріне мамандығы бойынша алғашқы тәжірибе жинауға мүмкіндік беретін мемлекеттік қолдау шарасы. Қатысу үшін мансап орталығына өтініш беру қажет. Әрбір қатысушыға жұмыс беруші тарапынан тәлімгер бекітіледі.
Бағдарлама бойынша орташа айлық жалақы 109,5 мың теңгені құрайды. Қаржыландыру Еңбек мобильділігі орталығы арқылы «Азаматтарға арналған үкімет» мемлекеттік корпорациясы екінші деңгейлі банктерде ашылған шоттарға ай сайын аударылады.
Сұранысқа ие мамандықтар қатарында мейіргер – 654 адам, заңгер – 367, бастауыш сынып мұғалімі – 309, тәрбиеші – 292 және шет тілі мұғалімі – 282 адам бар.
Ақмола облысының тұрғыны, жас маман Бәтима Жасұланова жастар практикасы арқылы көлік инженері болып жұмысқа орналасқанын айтты.
«2024 жылы университетті бітірген соң қысқарту салдарынан жұмыссыз қалдым. Мансап орталығы арқылы бағдарламаға қатысып, бүгінде облыстық жолаушылар көлігі және автомобиль жолдары басқармасында қызмет етудемін», – деді ол.
«Жетісу-Ақпарат»
