Талдықорған қаласының әкімі Ернат Бәзіл “Құлагер” шағын ауданындағы тоқтап тұрған құрылыс нысандарын аралап, жұмыспен танысты.
Бұл туралы 7-su.kz желілік басылымы BAQ.KZ сайтына сілтеме жасап хабарлайды.
Қала басшысы «Береке» коттедж қалашығындағы жөндеу жұмыстарына үңіліп, жұмысшыларға нақты тапсырмалар жүктеді. Бос тұрған тұрғын үйлерді қалпына келтіру процесінің барысы зерделеніп, құрылыс сапасын қатаң бақылау және белгіленген мерзімді сақтау қажеттілігі баса айтылды.
Қалада құрылыс жұмыстарының жанданғаны қуантады. Әкімнің тоқтап қалған нысандарға көңіл бөліп, оларды аяқтауды қолға алғаны – жақсы бастама. Тек үйлерді салумен шектелмей, сапасына да баса назар аударса дейміз. Сондай-ақ, жаңа үйлермен бірге инфрақұрылым, жол, жарық мәселелері де қатар шешілсе, қала тұрғындары үшін әлдеқайда ыңғайлы болар еді, — дейді қала тұрғыны Мейрамбек Қуатов.
“Ұлан” шағын ауданындағы абаттандыру жобалары да назардан тыс қалмайды. Алдағы уақытта бес жаңа ауланы салу жоспарланып отыр. Бұдан бөлек, былтыр пайдалануға берілген демалыс ауласының тиімділігі аса бағаланып, жаңа ұсыныстар да кеңінен қарастырылды.
Биыл Талдықорған қаласында салынатын құрылыс нысандары өткен жылға қарағанда көп. Ендігі мақсат – салынатын әрбір құрылыс нысанының санына емес, сапасының жоғары болуына жұмыс жасау. Әрине, кей мәселелерді әлі де пысықтау керек. Дегенмен, жұмыстарды биылғы жылы ертерек бастап жатырмыз. Ең бастысы, халық игілігіне арналған тың жобаларымызды жүзеге асыру, — деді қала әкімі Ернат Бәзіл.
Шағын аудан аумағында бой көтеретін жаңа саябақтың жобасы қарастырылды. Сондай-ақ баттандыру шараларының сапалы әрі белгіленген мерзімде орындалуын қамтамасыз ету үшін жауапты мекемелерге нақты міндеттемелер қойылды.
Фото: baq.kz
