Жетісу облысының орталығындағы көркем өнер мектебінде өткен салтанатты шарада сөз алған Ернат Дүйсенбекұлы жалпы спорт саласындағы қызметкерлерді кәсіби мерекесімен құттықтап, ізгі тілегін жеткізді.
– Бүгінгі шараның басты мақсаты – спортшылардың жеткен жетістіктерін бағалаумен қатар, оларға қолдау көрсету. Спортшылар күні тек спортшылардың ғана емес, жалпы салауатты өмір салтын ұстанатын барлық азаматтарға ортақ мереке. Мемлекет басшысы Қасым-Жомарт Кемелұлы Тоқаев спортты дамытуға ерекше мән беріп келеді. Президентіміздің тапсырмасына сәйкес қаламызда бұқаралық спортты дамыту, спорт инфрақұрылымын жаңарту және жасөспірімдерге қолдау бағытында ауқымды жұмыстар жүргізілуде. Бұл жетістіктер спортта тер төгіп жүрген жаттықтырушылар мен спортшылардың ерен еңбегінің нәтижесі,– деді қала әкімі.
Осыдан соң ол жалпы өңір спортшыларына жаңа жеңістер мен биік белестер тілеп саладағы 74 үздік спортшыны Құрмет грамотасы және арнайы Алғыс хаттармен марапаттады. Бұл жолғы шаһар басшысының қолыннан марапат алғандардың қатарында әлемдік додаларда топ жарып, ел абыройын асқақтатып жүрген үздік спорт саңылақтары, сала ардагерлері, жас спортшылар мен білікті жаттықтырушылар бар.
Сала жауаптыларының сөзінше, мұндай құрмет жас буын өкілдеріне зор шабыт беруіп, жауапкершілікті арттырады. Қазір қала спортын дамытуға мемлекетпен қатар, ірі кәсіпкерлер мен меценаттар да ат салысуда. Бүгінде олардың қолдауымен облыс орталығында бірқатар жаңа нысандар салынып, тұрғындардың спортпен алаңсыз айналысуына бар жағдай жасалуда. Мәселен, таяуда Еркін ауылында шағын футбол алаңы ашылып, қалада Көркем гимнастика спорт кешенінің құрылысы жүріп жатыр. Ал өткен жылы облыс орталығында кәсіби тұрғыда жаттығуға мол мүмкіндік беретін волейбол және үстел тенисіне арналған спорт кешендері қолданысқа берілген болатын.
Айдын КӘЛІМХАН
