Мемлекеттік айыптаушы Шымкент қаласы әкімінің орынбасары Руслан Берденовке жасалған шабуыл ісі бойынша айыпталушыға 11 жыл 3 ай бас бостандығынан айыру жазасын тағайындауды сұрады. Бұл туралы 7-SU.KZ ақпараттық порталы Stan.kz ақпарат агенттігіне сілтеме жасап хабарлайды.
Сот отырысында алғашқы болып мемлекеттік айыптаушы Бауржан Караманов сөз сөйледі. Ол оқиғаның мән-жайын толық баяндап, айыпталушы Ернар Жиембайдың кінәсі түрлі дәлелдер мен куәгерлердің айғақтарымен расталатынын атап өтті.
Прокурор жеңілдететін және ауырлататын мән-жайларға тоқталды. Жеңілдететін жағдай ретінде айыпталушының кәмелетке толмаған балаларының барын ескерді. Ал оның қылмысты мас күйде жасағаны ауырлататын жағдай ретінде есептелді.
Ернар Жиембайға қылмыстық кодексінің екі бабы бойынша айып тағылды:
- 99-бап, 1-бөлік – “Адам өлтіру”;
- 24-бап, 3-бөлік – “Қылмысқа дайындалу және адамның еркінен тыс жағдайларға байланысты аяқталмаған қылмысқа оқталу”.
