Астанада блогер Ерболат Жанәбіловтің жұбайы Эльмира Төлегенованың ісі бойынша әкімшілік сот отырысы өтуде, – деп хабарлайды 7-su.kz ақпараттық порталы.
Туризм және спорт министрлігінің Құмар ойын бизнесін реттеу комитетінің өкілі Әбдел Балтатегі істі әкімшілік құқық бұзушылықтан қылмыстық іс санатына ауыстыруды сұрады. Оның айтуынша, әкімшілік өндіріс аясында Төлегенованың қызметіне қатысты негізгі сұрақтарға жауап беру мүмкін емес.
Комитет өкілі «Zhana Business» курстарының құндылығы мен бағасы, қауымдастықтың бар-жоғы, жеңімпазды анықтау тәсілі және автоматтандырылған бағдарламаның алгоритмі туралы сұрақтарды мысалға келтірді.
«Бұл жайттар оның әрекеттерінде алаяқтық немесе заңсыз кәсіпкерлік белгілері бар екенін көрсетеді», – деді Балтатегі.
Осыған байланысты комитет ӘҚБтК-нің 445-1-бабы бойынша істі тоқтатып, материалдарды Қылмыстық кодекстің 214-бабы («Заңсыз кәсіпкерлік») және 190-бабында («Алаяқтық») көзделген қылмыстық әрекеттерге байланысты сотқа дейінгі тергеу органына беруді сұрады.
Судья Ақерке Бектұрғанова кеңесу бөлмесіне кетіп, қаулыны бүгін сағат 16:00-де жариялайтыны хабарланды.
