Қазақстан азаматтарына мүгедектігі бойынша және асыраушысынан айырылу жағдайы бойынша 496 млрд теңгеге жуық мемлекеттік жәрдемақылар мен әлеуметтік төлемдер төленді.
Жыл басынан бері республикалық бюджеттен осы мақсатқа 436,1 млрд теңге бағытталды. Бұдан бөлек, Мемлекеттік әлеуметтік сақтандыру қорынан (МӘСҚ) еңбекке қабілеттілігінен айырылу және асыраушысынан айырылу жағдайы бойынша шамамен 59,8 млрд теңге төлем жасалды.
2025 жылғы 1 қыркүйектегі жағдай бойынша:
-
543,7 мың адам – мүгедектігі бойынша,
-
184,1 мың адам – асыраушысынан айырылу жағдайы бойынша мемлекеттік әлеуметтік жәрдемақы алды.
Мүгедектігі бойынша төлемдердің көлемі мүгедектіктің тобына, себебіне және «Республикалық бюджет туралы» заңда белгіленген ең төмен күнкөріс деңгейіне байланысты есептеледі.
Асыраушысынан айырылу жағдайы бойынша жәрдемақы көлемі асырауындағы адамдар санына, қайтыс болу себебіне және ең төмен күнкөріс деңгейіне тәуелді.
ҚР Еңбек және халықты әлеуметтік қорғау министрлігі міндетті әлеуметтік сақтандыру жүйесіне қатысушылар үшін МӘСҚ-тан қосымша төлемдер берілгенін мәлімдеді. 2025 жылғы 1 қыркүйектегі дерек бойынша:
-
97 мың адам еңбек ету қабілетінен айырылу бойынша төлем алды,
-
65,9 мыңға жуық отбасы асыраушысынан айырылу төлемін алды.
2025 жылғы 1 қаңтардан бастап мүгедектік пен асыраушысынан айырылу жағдайына байланысты төлемдердің көлемі ең төмен күнкөріс деңгейінің өсуіне орай 6,5%-ға артты. Үкімет шешімімен МӘСҚ төлемдері де осындай көлемде өсті.
Мәселен, биылғы жылы жалпы аурудан мүгедектік бойынша МӘЖ мөлшері:
-
1-топ үшін – 101 702 теңге,
-
2-топ үшін – 81 362 теңге,
-
3-топ үшін – 55 474 теңге.
Ал 1 қыркүйектегі мәлімет бойынша, еңбекке қабілеттілігінен айырылу бойынша төлемдердің орташа мөлшері 71 468 теңге, асыраушысынан айырылу бойынша – 74 460 теңге болды.
