Облыста тоғызыншы «Жанұя» отбасын қолдау орталығы ашылды. Енді бұл әлеуметтік маңызы бар нысан көмегін ақсулық ағайын тегін ала алады. Орталықтың басты мақсаты – отбасы институтын нығайту, түрлі тұрмыстық жағдайларға тап болған жандарға қолдау көрсету.
Салтанатты жиында облыстық жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаев пен аудан әкімінің орынбасары Бекзат Ермұханбетов құттықтау сөз сөйлеп, орталықтың жұмысына сәттілік тілесе, Ақсу ауданының Құрметті азаматы Амантай Айтбаев ақ бата беріп, жаңа мекеменің қадамына ақ жол тіледі.
Облыстық жұмыспен қамтуды үйлестіру және әлеуметтік бағдарламалар басқармасы берген мәліметке сүйенсек, өмірлік қиын жағдайға тап болған отбасыларды анықтау және қолдау мақсатында құрылған «Жанұя» орталықтары өңірдің аудандары мен қалаларында 2023 жылдан бастап ашыла бастады. Орталыққа жүгінгендерге білікті заңгерлер, психологтар, әлеуметтік қызметкерлер қызмет көрсетеді. Жаңадан бой көтерген орталықта жатын орын, балалар ойын бөлмесі, кір жуатын жер, асхана, тынығу бөлмесі және қызметкерлерге арналған мәжіліс залы, әлеуметтік сала мен психолог мамандарына арналған жеке бөлмелер жан-жақты заманауи үлгіде жабдықталған.
– Біз бұл орталықтарды болашақ үшін ашып отырмыз. Мұнда келушілер мемлекеттен қолдау таба алады. Біздің мақсатымыз – қолдауға зәру жандарға кеңес беру ғана емес, нақты көмек көрсету, жұмысқа орналастыру, құқық қорғау, психологиялық қолдау көрсету, – дейді облыстық жұмыспен қамтуды үйлестіру және әлеуметтік бағдарламалар басқармасының басшысы Ермек Мизамбаев.
Аудандық ардагерлер кеңесінің маманы Салтанат Айтмұханованың айтуынша, отбасы – Отанның кішкентай бейнесі. «Адам бойындағы ең алғашқы мейірім, сыйластық пен қамқорлық ошақ қасында қалыптасады. Сондықтан да «Жанұя» орталығы – ата-ананың қадірін арттыруға, ұлықты ұл, қылықты қыз тәрбиелеуге өз септігін тигізетіні анық. Енді ауылдағы ағайын өз мәселесін шешуде жалғыз қалмайды. Олар жан-жақты көмек алып, қиындықты қасқайып көтеріп, күліп шығарып салуға бейімделеді. Ең бастысы, еліміз аман, жұртымыз тыныш болса екен», – деген ақжарма тілегімен бөлісті.
Жергілікті тұрғындар да жаңа орталықтың ашылғанына дән риза. Жансүгіров ауылының тұрғыны, көпбалалы ана Мариям Дүйсенбина мұндай орталық әсіресе ауылды жердегі тұрғындарға ауадай қажет екенін айтты. «Қиындыққа тап болған отбасы бірден мамандарға хабарласуға мүмкіндігі бола бермейді. Енді олар көмекті орталықтан алады. Ең бастысы, бәрі тегін беріледі. Орталық көпшілік үшін шынайы қолдаудың, жанашырлықтың бесігіне айналатынына сенімдімін», – дейді көпбалалы ана.
Жыл басынан бері облыстық «Жанұя» отбасын қолдау орталықтарына 212 отбасынан 570-тен астам адам тіркеліп, жан-жақты психологиялық, әлеуметтік және қолдау қызметтерін алған.
Биыл Ескелді және Көксу, Алакөл, Кербұлақ аудандарында «Жанұя» отбасын қолдау орталықтары ашылып, халық игілігіне берілді. Келер жылы Талдықорған қаласында ашылады деген жоспар бар.
Еңлік кенеБАЙ,
Ақсу ауданы
