1 қазан күні еліміздің бірқатар өңірінде ауа райының қолайсыздығына байланысты дауылды ескерту жарияланды. Бұл туралы «Қазгидромет» РМК хабарлады.
Батыс өңірлерде – Ақтөбе, Атырау, Батыс Қазақстан және Маңғыстау облыстарында қатты жел соғып, өрт қаупі жоғары деңгейде сақталады. Кей жерлерде аяз байқалады.
Алматы, Жетісу, Жамбыл және Шығыс Қазақстан облыстарының таулы аудандарында қар аралас нөсерлі жаңбыр жауады. Алматы қаласында таңертең және түстен кейін жауын күтілсе, Талдықорғанда да мол жауын-шашын болады.
Қостанай, Павлодар, Солтүстік Қазақстан және Ақмола облыстарында жаңбырмен бірге қар түсіп, көктайғақ болуы ықтимал. Кей жерлерде тұман байқалады. Петропавлда қар аралас жауын-шашын, ал Орал мен Атырауда түнде 3 градусқа дейін аяз күтіледі.
Синоптиктердің дерегінше, еліміздің орталық және шығыс өңірлерінде желдің жылдамдығы 20-28 м/с-қа дейін күшеюі мүмкін. Бұл жағдай көлік қозғалысына, шаруашылық жұмыстарға және тұрғындардың күнделікті тұрмысына қиындық келтіруі ықтимал.
Мамандар тұрғындарды ауа райы болжамын ескеріп, сақтық шараларын қатаң ұстануға шақырады.
