Қазақстанда атаулы әлеуметтік көмек (АӘК) тағайындау тәртібіне жаңа өзгерістер енгізілмек.
Бұл туралы Еңбек және халықты әлеуметтік қорғау министрлігіне сілтеме жасап, 7-su.kz хабарлайды.
Жаңа ережеге сәйкес, егер жан басына шаққандағы жиынтық қарыз сомасы екі еселенген ең төменгі күнкөріс деңгейінен асып кетсе, отбасы АӘК алу құқығынан айырылады.
Мысал: төрт адамнан тұратын отбасы 2 миллион теңге несие рәсімдесе, бұл сома алдымен үшке, кейін төртке бөлінеді. Нәтижесінде жан басына шаққандағы борыш шамамен 166 мың теңге болады. Бұл ең төменгі күнкөріс деңгейінен әлдеқайда жоғары болғандықтан, отбасы жәрдемақы ала алмайды.
Сонымен қатар, министрлік өкілі Шыңғыс Шәкiлдің айтуынша, отбасылар тұрғын үй мақсатындағы депозит ашып, ақша жинай алады. Мұндай салымдар табыс ретінде есептелмейді.
«Отбасына есептегенде 200 айлық есептік көрсеткіштен (786 400 теңге) асатын банктік салымдар ескеріледі. Бірақ тұрғын үй құрылыс жинақ салымдары табысқа қосылмайды. Бұл мәліметтер азаматтардың материалдық жағдайын әділ бағалауға мүмкіндік береді», – деді әлеуметтік көмек департаментінің бас сарапшысы Шыңғыс Шәкiл.
Жаңа тәртіптің басты мақсаты – әлеуметтік көмекті тек шынымен мұқтаж азаматтарға бағыттау.
