Қазақстан Республикасының Премьер-министрі Олжас Бектенов Халықаралық Аралды құтқару қоры (ХАҚҚ) басқармасының Қазақстан төрағалығымен өткен екінші отырысына қатысушы мемлекеттер делегацияларының басшыларымен кездесті.
Кездесу барысында тараптар Арал теңізінің су деңгейін арттыру және аймақтағы су-энергетикалық тепе-теңдікті сақтау жөніндегі бірлескен шараларды талқылады. Бұл мәселелер Қазақстан Президенті Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында көтерілген бастамалармен сабақтас.
Олжас Бектенов өз сөзінде су-энергетикалық ресурстарды тиімді пайдалану – өңірдің энергетикалық және азық-түлік қауіпсіздігін қамтамасыз етудегі стратегиялық бағыт екенін атап өтті. Оның айтуынша, биылғы вегетациялық кезеңнің күрделілігіне қарамастан, үкіметтердің үйлесімді іс-қимылының арқасында Арал бассейнінде тұрақты су режимін сақтау мүмкін болды.
«Әр елдің өз ұлттық мүддесі бар, біз оны қорғауға міндеттіміз. Бірақ басты мақсатымыз – тату көршілік пен ұзақмерзімді серіктестік. Күнделікті міндеттерді шешуде стратегиялық басымдықтарға нұқсан келтірмеуіміз қажет», – деді Премьер-министр.
Қазақстан тарапының төрағалығы кезеңінде басты назар цифрлық трансформация мен жасанды интеллектіні су саласына енгізуге бағытталмақ. Бұл бастама су ресурстарын пайдаланудың ашықтығын қамтамасыз етіп, су ысырабының азаюына ықпал етпек.
Сондай-ақ Арал теңізі бассейнінде су ресурстарын есепке алу, мониторинг және басқарудың бірыңғай автоматтандырылған жүйесін қалыптастыру мәселесі де талқыланды.
Кездесу барысында Тәжікстан Премьер-министрінің орынбасары Зиёзода Сулаймон, Өзбекстан Президентінің кеңесшісі Шухрат Ганиев және Түрікменстанның ауыл шаруашылығы министрі Чарыяр Четиев сөз сөйледі.
Қорытынды сөзінде Олжас Бектенов Қазақстанның ашықтық, өзара түсіністік және сындарлы диалог қағидаттарына адалдығын атап өтті.
«Жетісу-Ақпарат»
