Мемлекет басшысының тапсырмасына сәйкес, еліміздің өңірлерінде азаматтардың өмір сүру сапасын жақсарту мақсатында қайтарылған активтер есебінен әлеуметтік инфрақұрылым жобалары қарқынды жүзеге асырылып жатыр.
Осы бағыттағы жұмыстар аясында Үкімет Арнаулы мемлекеттік қордан 480 млн. теңге бөліп, Жетісу облысындағы сумен жабдықтау жүйелерін жаңғырту мен жаңа нысандар салу жобаларын қолдады.
Қоңыр және Ұмтыл ауылдары ауыз сумен қамтылады
Бөлінген қаражат есебінен Алакөл ауданының Қоңыр ауылында ұзындығы 17 шақырымдық су желісі, ал Қаратал ауданының Ұмтыл ауылында 4,8 шақырымдық жаңа су жүйесі салынады.
Бұл жобалардың нәтижесінде мыңнан астам ауыл тұрғыны таза ауыз сумен қамтамасыз етіледі.
Аймақтағы су инфрақұрылымын жаңарту жалғасуда
Биылдың өзінде Жетісу облысында сумен жабдықтау жүйесін жаңғырту және салу бағытында 18 жоба қолға алынған.
Бұл жұмыстар ауылдық жерлердегі тұрмыс сапасын арттыру, халық денсаулығын жақсарту және инфрақұрылымдық теңгерімділікті қамтамасыз етуге бағытталған.
Мақсат – ауылдарды 99,9% сумен қамту
Жоспар бойынша, 2025 жылдың соңына дейін өңірдегі орталықтандырылған ауыз сумен қамтылған ауылдардың үлесін 99,9%-ға жеткізу көзделген.
Бұл көрсеткіш 329 ауылды және шамамен 697 мың тұрғынды қамтиды.
Осылайша, қайтарылған активтер есебінен жүзеге асырылып жатқан жобалар Жетісу өңірінің әлеуметтік және инженерлік инфрақұрылымын жақсартуға нақты үлес қосуда.
«Жетісу-Ақпарат»
