2030 жылға дейін Қазақстандағы суармалы жерлердің 70 пайызы заманауи су үнемдейтін суару технологияларымен қамтылады. Бұл туралы Орталық коммуникациялар қызметінің алаңында өткен брифингте Су ресурстары және ирригация министрлігінің Жерасты сулары департаментінің директоры Жайық Ерікұлы мәлімдеді, деп хабарлайды 7-su.kz ақпарттық порталы.
Министрлік ауыл шаруашылығы саласындағы су үнемдеу шараларын кеңейтіп, су ресурстарын тиімді пайдалану бағытында ауқымды жұмыс жүргізіп келеді. Суармалы егіншілік елдегі су тұтынудың 65 пайызын құрайтындықтан, саланы жаңғырту маңызды міндеттердің бірі болып отыр.
2024 жылдан бастап фермерлерді су үнемдейтін технологияларға көшуге ынталандыру мақсатында субсидиялау үлесі 50%-дан 80%-ға дейін ұлғайтылды. Енді ұңғымаларды бұрғылау, инфрақұрылым тарту және заманауи суару жүйелерін орнату шығындарының едәуір бөлігі мемлекет тарапынан өтеледі.
«Бұл шаралар 2023 жылы 312,2 мың гектар аумақта қолданылған су үнемдейтін технологиялардың көлемін ағымдағы жылы 500 мың гектарға дейін арттыруға мүмкіндік берді. Бұл – суармалы жерлердің жалпы көлемінің 30 пайызы. Ал 2030 жылға қарай бұл көрсеткіш 1,3 миллион гектарға жетіп, жалпы аумақтың 70 пайызын қамтиды», – деді Жайық Ерікұлы.
Су үнемдеу шаралары өнеркәсіптік кәсіпорындарды да қамтиды. Су кодексіне сәйкес, 7 жыл ішінде өндіріс орындары айналмалы және қайта сумен жабдықтау жүйелеріне кезең-кезеңмен көшуге міндетті. Нәтижесінде, 2030 жылға қарай суды қайта пайдалану үлесі қазіргі 13,1 пайыздан 28 пайызға дейін өседі.
Сондай-ақ министрлік су ресурстарын тиімді пайдалануға қатысты нормативтік-құқықтық актілерді түсіндіру және түсіндіру жұмыстары үшін кәсіпорын өкілдерімен тұрақты кездесулер өткізіп келеді.
Су мәдениетін қалыптастыру мақсатында «Суды үнемде – болашақты сақта» республикалық жобасы аясында мектептер мен оқу орындарында ашық сабақтар мен ақпараттық іс-шаралар ұйымдастырылып жатыр. Биыл бұл науқанмен 2 миллионнан астам оқушы қамтылды. Келесі жылы колледждер мен жоғары оқу орындарын қамту жоспарланып отыр.
«Суға ұқыпты қарау – болашақ ұрпақ алдындағы жауапкершілігіміз. Су үнемдеу мәдениеті – елдің экологиялық және экономикалық тұрақтылығының негізі», – деп атап өтті министрлік өкілдері.
