Бішкек қаласында Орталық Азия елдерінің әйел-көшбасшылары, сарапшылары мен мемлекеттік органдар өкілдерінің қатысуымен «Су ресурстары мен энергетика саласындағы әйелдер» атты өңірлік диалог өтті. Кездесудің негізгі мақсаты – климаттық тұрақтылықты қамтамасыз етудегі, су қауіпсіздігі мен энергетикалық көшуді ілгерілетудегі әйелдердің рөлін арттыру.
Қазақстан атынан форумға ҚР Энергетика министрлігі ЖЭК департаментінің бас сарапшысы Айнара Айдынқызы қатысты. Ол өз сөзінде энергетика саласындағы әйелдердің кәсіби қауымдастығын нығайту бағытында атқарылып жатқан бастамаларға тоқталды.
«Qazaq Green» жанындағы Әділетті энергетикалық көшу жөніндегі әйелдер комитеті және KazEnergy қауымдастығы жанындағы Әйелдер энергетикалық клубы тәжірибе алмасуға, көшбасшылықты дамытуға және кәсіби өсімге ықпал етіп келеді.
Қазақстан энергетикалық көшу үдерісінде әйелдердің белсенді қатысуына ерекше мән беріп отыр. Бұл бағытта кәсіби даму, шешім қабылдауға қатысу және өңіраралық ынтымақтастықты кеңейту шаралары іске асырылуда.
Еліміз 2030 жылға қарай жаңартылатын энергия көздерінің (ЖЭК) үлесін 15%-ға, ал 2050 жылға қарай баламалы көздерді қоса алғанда 50%-ға дейін арттыруды көздеп отыр.
Қазіргі таңда бұл салада шамамен 2000 маман жұмыс істейді, олардың ішінде әйелдердің үлесі жыл сайын артып келеді. Сарапшылардың айтуынша, әйелдердің стратегиялық жоспарлауға және жобаларды басқаруға қатысуы энергетикалық көшу үдерісін жылдамдатуға ықпал етпек.
