Қазақстанда кәсіподақ ұйымының құрылғанына биыл 120 жыл. Қарапайым еңбек адамының мүддесі мен құқын қорғайтын бұл ұйымды қазақ жерінде өткен ғасырдың басында Қарағанды көміршілері ұйымдастырған екен. Кейін кеңес үкіметі ел тіршілігінің барлық салаларында кәсіподақ ұйымдарын құра бастаған. Ал, халыққа білім беру саласында 1925 жылдан бері кәсіподақ жұмыс істейді. Яғни бүгінде «Оқу-ағарту, бюджеттік ұйымдар, ғылым және білім қызметкерлерінің кәсіподағы» деп аталатын қоғамдық ұйымға ғасыр толып отыр.
Жалпы облыста және өңірлерде кәсіподақ ұйымдары ежелден жетік тәжірибе, жақсы дәстүр қалыптастырған. Жақында Панфилов ауданындағы Әбілхан Қастеев атындағы орта мектепте «Ашық алаң» форматында өткен «Кәсіподақ күші – ұжым бірлігі» атты білім беру саласындағы кәсіподақ мүшелерінің міндеттері мен мүмкіндіктерін айқындайтын пікірлесу семинарының мазмұны осы ойымызды айқындай түсті.
Облыстық «Оқу-ағарту, бюджеттік ұйымдар, ғылым және жоғары білім қызметкерлерінің кәсіподағы» Панфилов аудандық филиалында 5846 мүше бар. Олардың төрт мыңға жуығы мұғалімдер болса, қалғаны білім беру мекемелерінде еңбек ететін қызметшілер. Білім беру саласындағы кәсіподақ мүшелері өңірдегі 72 бастауыш ұйымға біріктірілген. Аудандағы 50 мектеп пен 20 балабақшада кәсіподақтың бастауыш ұйымдары бар.
Шараға «Оқу-ағарту, бюджеттік ұйымдар, ғылым және жоғарғы білім қызметкерлерінің облыстық кәсіподақ ұйымының» төрағасы Мэлс Төлепбергенов, Панфилов аудандық филиалының төрағасы Мақытбек Тұрлыбеков, аудандық білім бөлімінің басшысы Қайсар Сейітқожаев, білім беру мекемелерінің облыстық кәсіподақ ұйымының заңгер-кеңесшісі Әсет Қайырхан қатысты.
Күнделікті мектеп тіршілігінде басшылар тарапынан тапсырылатын басы артық жұмыстар ұстаздың негізгі қызметіне кедергі келтіретіні жөнінде әртүрлі ой-пікірлер айтылды.
Семинар қорытындысында сөз сөйлеген облыстық білім саласы қызметкерлері кәсіподағының төрағасы Мэлс Құлмұханұлы мен аудандық білім бөлімі кәсіподағының төрағасы Мақытбек Әділұлы мектеп ұжымына және кәсіподақ ұйымына шараға жан-жақты, тыңғылықты дайындық жасағандары үшін ризашылығын білдірді. Семинарға белсенділікпен қатысқан ұстаздар облыстық, аудандық кәсіподақ ұйымының Алғыс хаттарымен, бағалы сыйлықтарымен марапатталды.
Жалпы семинар жұмысы қатысушыларға жағымды әсер қалдырды. Жиынды білім ошағының өнерпаздары әсем әнмен әрлеп, мың бұралған бимен өрнектеді.
Мырзағали Нұрсейіт
Панфилов ауданы
