Бүгінде Жетісу облысының орталығында «Таза Қазақстан» экологиялық акциясы жалғасуда. Осыған байланысты қазір қала аумағындағы заңсыз қоқыс төгілетін орындарға ағаш отырғызу жұмыстары басталған.
Жауаптылардың сөзінше, жыл бойы тұрақты түрде жалғасып келе жатқан мұндай тазалық шаралары қаланың санитарлық жағдайын жақсартып, қоршаған ортаға деген жауапкершілікті арттыруға бағытталған. Бейсенбі күні өткен тазалық акциясына шаһардағы коммуналдық мекеме мен спорт мектептерінің қызметкерлері, жеке кәсіпкерлер және еріктілер қатысқан. Олар өздеріне тиесілі іргелес аумақтарды ретке келтіріп, көшелер мен аулаларды ағаш жапырақтары мен күл-қоқыстан тазартып, ағаш егу жұмыстарына атсалысқан. Осындай көптің атқарып жатқан еңбегіне қарамастан, соңғы кездері шаһардағы жол бойларына және басқа да аумақтарға рұқсатсыз жерлерге қоқыс тастау фактілері көбейген. Осыған сәйкес, қала әкімдігі мен тәртіп сақшылары қала тұрғындарын тазалық талаптарын қатаң сақтауға шақырады.
Қала әкімдігінің мәліметінше, қазір Талдықорған қаласы бойынша шаһар тазалығына 900-ден астам жұмысшысы бар 8 кәсіпорын жауапты. Бұдан бөлек, «Таза Қазақстан» акциясы аясында «Таза Сәрсенбі», «Таза Бейсенбі», «Сенбілік» сынды тағы басқа да тазалық шаралары жиі өтеді. Мұндай шараға қатысқан адамдардың барлығы тиісті құрал-саймандармен толық қамтылып, жүк көліктері мен басқа да техникалар жұмылдырылады. Ал «Таза Бейсенбі» экологиялық іс-шарасы енді әр апта сайын тұрақты түрде өткізіліп тұрады. Сонымен бірге коммуналдық сала мамандары қазір күнделікті қала көшелерін, жол жиегін, арық жүйелерін, саябақтар мен ықшам аудандарды ағаш жапырақтарынан тазартып, қураған ағаштарды кесуде.
Осы орайда қалалық жолаушылар көлігі және автомобиль жолдары бөлімінің басшысы Ерлан Ниетбаев қала тұрғындарына арнайы үндеу жолдап, тұрмыстық қалдықтарды тек белгіленген орындарға тастауды сұрайды. Егер кез келген жерге қоқыс тастау анықталған жағдайда, заңнамаға сәйкес әкімшілік шаралар қолданылатынын ескертеді.
Айдын КӘЛІМХАН
