Қазақстанның Су ресурстары және ирригация министрлігі, БҰҰ Даму бағдарламасы және Еуразиялық даму банкі «Қазақстандағы тұрақты ирригация үшін бизнес экожүйені дамыту» жобасын жүзеге асыру туралы үшжақты келісімге қол қойды. Жобаны іске асыруға ЕАДБ 5,3 млн доллар көлемінде грант бөледі.
Қаржылық келісімге Су ресурстары және ирригация министрі Нұржан Нұржігітов, Қазақстандағы БҰҰ Даму бағдарламасының Тұрақты өкілі Катаржина Вавьерниа және Еуразиялық даму банкінің басқарма төрағасының орынбасары Руслан Даленов қол қойды.
Бірнеше жылға жоспарланған жоба аясында:
-
Ұлттық су ресурстары ақпараттық жүйесін құру;
-
су көлемін болжау және тиімді бөлу құралдарын енгізу;
-
заманауи ирригацияның өңірлік орталықтарын қалыптастыру;
-
сала мамандарының біліктілігін арттыру;
-
су үнемдеу технологияларын өндіріске енгізу көзделген.
Министр Нұржан Нұржігітовтің сөзінше, бұл бастама Қазақстанның ирригация жүйесін жаңғыртып, суды тиімді пайдалануды арттыруға бағытталған. Оның айтуынша, жоба су шаруашылығын дамытуға сыртқы қаржы тартуға мүмкіндік берсе де, стратегиялық шешімдер мен басқару құзыреті толықтай Қазақстанның қолында қалады.
– Мемлекет басшысының тапсырмасына сәйкес біз су саласына инвестиция тарту бойынша белсенді жұмыс жүргізіп келеміз. Алайда барлық стратегиялық шешім тек Қазақстанда қабылданады және солай қала береді. Су ресурстары мен нысандарын шет мемлекеттердің қолданысына беру мәселесі ешқашан қаралған емес. Басты мақсатымыз – азаматтарымыздың мүддесін қорғау, еліміздің қауіпсіздігі мен тұрақты дамуын қамтамасыз ету үшін су секторын жаңғырту, – деді министр.
Жоба жүзеге асқан жағдайда ирригация жүйесінде заманауи технологияларды қолдану, деректерге негізделген жоспарлау және су үнемдеу мәдениетін қалыптастыру арқылы ауыл шаруашылығының өнімділігін арттыруға және климаттық өзгерістер жағдайында су қауіпсіздігін нығайтуға мүмкіндік туады.
