Жуырда Ұлттық Primary Health Care қауымдастығының жобасы аясында Үштөбе қалалық емханасында «Үздік тәжірибе орталығы» ашылды. Осыған орай әлеуметтік, медициналық және психологиялық көмек беретін орталыққа ат басын бұрдық.
Бұл орталық әрбір отбасының денсаулығы мен әл-ауқатына жан-жақты көзқарасты қамтамасыз ете отырып, медициналық, психологиялық және әлеуметтік көмек беруде алтын көпір болады. Себебі, мұнда, емдеу жұмыстарынан бөлек, пациенттерге әлеуметтік қолдау көрсетіледі. Үздік тәжірибелер орталығында «Науқас көзімен алғашқы 5 минут», «Халық кеңесі», «Дұрыс тамақтану мектебі», «Денсаулық мектебі» атты жобалар жүзеге асырылады. Емханаға тіркелген 27 мыңнан астам адамға 22 отбасылық дәрігер мен 120-дан астам түрлі сала мамандары қызмет ұсынады. Атап айтсақ, отбасылық дәрігер, патронаждық медбике, психолог, әлеуметтік қызметкер және қажетті жағдайда бейінді мамандар көпшіліктің көңілін табуға ықпал етуде.
– Жаңа туған нәрестелердің 90 пайызы дені сау болып туады. Біздің мақсатымыз оны 100 пайызға жеткізу. Мұнда балаға 6 айдан кейін қандай тамақ беру керектігінен бастап алғашқы медициналық көмек, скрининг, әлеуметтік-психологиялық көмекке дейін көрсетеміз. Тіпті, ауырып ем алуға келген ананың баласын қарайтын тәрбиешілеріміз де бар. Және олар жәй қарамайды, баланы дамытуға арналған жаттығулар жасап, түрлі дәріс өткізеді, – дейді директордың емдеу ісі бойынша орынбасары Арман Жанқұлдықов.
Орталық жасыл, сары, қызыл деп үш бөлікке бөлінген. «Жастар орталығы» деп аталатын жасыл аймақта саламатты өмір салтын ұстанып, жаттығамын деген жасөспірімдерге бар жағдай жасалған. Сары бөлікте дәрігерлер науқастардың қан қысымын өлшеп, алғашқы көмек көрсетсе, қызыл аймақта екпе, скрининг, оқыту орталығы орналасқан.
Үздік тәжірибе орталығы бірнеше бағытта жұмыс істейді. Соның бірі – мультидисциплинарлық командалардың жұмысы. Мамандардың айтуынша, бұл топ медициналық қана емес, әлеуметтік мәселелерді де шешуге ықпалдасады. Бұл мақсатта жергілікті әкімдіктермен, жұмыспен қамту орталықтарымен, әлеуметтік қорғау қызметі және кризистік орталықтармен жұмыс жолға қойылған. Олар алдымен келген адамды қабылдап, мекемеде құрылған 12 топтың біріне тіркеп, жауапты маман бөледі.
Қызметкерлердің айтуынша, аудандағы жомарт жандардың көмегімен тұрмысы төмен отбасыларға көмір, отын, азық-түлік әперуге көмек керек. Мамандардың жалғыз тілегі – тұрмысы төмен отбасыларға көмектесетін демеуші көп болса.
Орталық жұмысының нәтижесінде жаңа медициналық-әлеуметтік көмектің қолжетімділігі мен сапасы жақсармақ. Иә, аудан тұрғындарына медициналық көмек көрсетудің сапасын жақсарту мақсатында ашылған орталықтың халыққа тигізер пайдасы зор.
Айдар ҚАЛИЕВ
