Бүгінде Жетісу облысының орталығында төтенше жағдайлар департаментінің қызметкерлері тұрғын үйлерді аралап, өрт қауіпсіздігі ережелерін түсіндіру жұмыстарын жалғастыруда.
Сала мамандарының мәліметінше, рейд барысында тұрғындарға жылыту маусымындағы сақтық шаралары ескертіліп, үйлерге көміртегі тотығын анықтайтын датчиктер орнатылуда. Аталған құрылғы өрт қауіпі туындап, үйлерге улы газ тарала бастаса, бірден хабар береді. Бұл хабарлағыш алдымен Талдықорған қаласы бойынша халықтың әлеуметтік осал топтарындағы азаматтардың үйлеріне орнатыла бастаған. Қазір облыс орталығында жұрттың әлеуметтік жағынан әлжуаз санатқа жататын 1040-қа жуық отбасы тіркеуде.
– Осы бір қарапайым қауіпсіздік құралы – әр шаңырақтың сақтық қорғаны. Бүгінгі күнге дейін аймақтағы 2 мыңға жуық үйге орнатылды. Соның нәтижесінде өңірдегі өрт саны өткен жылдың осы мезгілімен салыстырғанда 10 пайызға азайды. Дейтұрғанмен, «Сақтықта қорлық жоқ» деген. Әр шаңырақтың тұрғындары үйдегі пеш пен электр құралдарын жиі тексеріп, түтін шығатын мұржалардың бітеліп қалуын, орнатылған датчиктердің жұмысын қадағалап тұруы тиіс, – дейді төтенше жағдайлар департаментінің өкілдері.
Жауаптылардың сөзінше, датчиктерді орнату бүгінгі күнге дейін өз тиімділігін көрсетіп келеді. Мәселен, өткен жылғы жылыту маусымдарында аталған құрылғының көмегімен жеке сектордағы өрт оқиғалары қала бойынша айтарлықтай азайған. Қазір аталған датчиктерді орнату жұмыстары жалғасуда. Ол тұрғын үйлерде өрт және ыстан туындайтын оқыс оқиғалардың алдын алумен қатар қауіпсіздік ережелерін сақтауға мүмкіндік береді.
Айдын КӘЛІМХАН
