2025 жылдың басынан бері халықтың әлеуметтік осал топтарының құқықтарын қорғау мақсатында 1 356 тексеру жүргізілді. Бұл туралы ҚР Еңбек және халықты әлеуметтік қорғау министрлігі хабарлады.
Тексерулердің 461-і – жоспардан тыс, 558-і – профилактикалық бақылау аясында, ал 337-сі – прокуратура талаптарының негізінде өткізілген. Нәтижесінде анықталған бұзушылықтарды жою туралы 701 ұйғарым беріліп, 79,7 млн теңгеден астам сомаға 349 әкімшілік айыппұл салынған.
Бақылаумен қамтылған негізгі нысандар:
- мемлекеттік және квазимемлекеттік ұйымдар – 264
- денсаулық сақтау мекемелері – 168
- білім беру ұйымдары – 225
- әлеуметтік қорғау нысандары – 315
- мәдениет – 56
- спорт – 55
- көлік инфрақұрылымы – 44
- қоғамдық тамақтану – 26
- сауда – 96
- қаржы қызметі – 24
- өзге нысандар – 86
Қызылорда облысында халықтың қозғалысы шектеулі топтары үшін нысандардың қолжетімділігін тексеру мақсатында Байқоңыр қаласының көпбейінді ауруханасында жоспардан тыс бақылау жүргізілді. Тексеру нәтижесінде нысан иесіне ұйғарым беріліп, жауапты тұлға әкімшілік жауапкершілікке тартылды.
«Бүгінгі таңда облыстағы инфрақұрылым мүгедектігі бар және қозғалысы шектеулі азаматтарға қолжетімді бола бастады. Парктер, медициналық мекемелер, мемлекеттік қызмет көрсету орындары сияқты маңызды нысандарда жағдай біршама жақсарды», – деді Қызылорда қаласының тұрғыны, I топтағы мүгедектігі бар Жадра Абуова.
