Президент Қасым-Жомарт Тоқаев ауыл әкімдерінің диалог платформасында сөз сөйледі, – деп хабарлайды 7-su.kz ақпараттық порталы.
Мемлекет басшысы бір палаталы жаңа Парламентте Президент квотасы болмайтынын мәлімдеді.
«Мен биылғы жолдауымда бір палаталы Парламент құру туралы бастама көтердім. Бұл осыған дейінгі саяси өзгерістердің заңды жалғасы деуге болады. Біз “Күшті Президент – ықпалды Парламент – есеп беретін Үкімет” қағидатын орнықтыра түсеміз, яғни еліміз Президенттік Республика болып қала береді. Жаңа бастама қоғамда қызу талқыланып жатыр. Парламенттің құрылымына қатысты көптеген ұсыныс түсіп жатыр. Мысалы, депутаттардың саны халық санына сәйкес, яғни пропорционалды болуға тиіс деген ойлар айтылып жатыр. Мұндай ұстаныммен қарайтын болсақ, олардың саны 200 адамға жетеді. Қазір қос палатада 148 депутат бар», – деді Президент.
Тоқаев Парламенттік реформаның екі палатаны жай біріктіре салу емес екенін атап өтті:
«Меніңше, депутат санын тым көбейтудің қажеті жоқ. Керісінше, оңтайландыру керек, Парламенттің жұмысын жетілдіру қажет. Мысалы, бір палаталы жаңа Парламентте Президент квотасы болмайды. Барлық депутат бірдей тәртіппен сайлануы қажет. Бұл – алдағы Парламенттік реформа аясында жасалатын аса маңызды қадам. Мұны жақсы ұғынып, жұртшылыққа кеңінен түсіндіру қажет», – деді Президент.
Сонымен қатар, ол нағыз кәсіби Парламент жасақтау қажеттігін айтты:
«Заң шығару органына білікті әрі тәжірибелі мамандар, яғни өз ісінің майталмандары келуге тиіс. Бір сөзбен айтқанда, біз нағыз кәсіби Парламентті жасақтауымыз керек. Жаңа комитеттер құру мәселесін қарастыру қажет. Цифрландыру, аймақтарды дамыту жұмысымен айналысатын комитеттер өз алдына бөлек болғаны жөн деп санаймын. Бұл мәселелерді арнайы жұмыс тобы мұқият зерделейді. Осы реформаға қатысты басқа да көптеген ұсыныс бар. Соның бәрін әбден пысықтап, кейін жариялаймыз. Менің де осы аса маңызды реформа бойынша ұсыныстарым бар», – деді Тоқаев.
Президенттің пікірінше, Конституцияға енгізілетін түзету өте көп болуы мүмкін:
«Сондықтан референдум барысында халық жаңа Ата Заңға дауыс беретін болады деп айтсақ, қателеспейміз. Осындай күрделі, жауапты жағдайда елімізде тыныштық, тұрақтылық болуы керек. “Заң мен тәртіп” тұжырымдамасын бәріміз бір қоғам болып сақтауымыз қажет. Құқық қорғау органдары өз кәсібилігін көрсетуі қажет. Арандатушыларға немесе “лас, көлеңкелі” саясатпен айналысқысы келетін адамдарға жол бермейміз», – деді Мемлекет басшысы.
